Еліміздің бірнеше қаласының тұрғындары шетелге саяхат үшін алған жолдамаларының ақшасын қайтара алмай жүр. Авторлық турды сатқан келіншек оларды алдап кеткен деп хабарлайды bairaqmedia.kz

Бір ғана отбасы миллионға жуық қаражат бердік. Кейін ақшаны қайтаруды сұрағанда әне қайтарамын, міне қайтарымын деп соза бастады. Әлі күнге дейін қаржы қайтарылмады, - деді Ақтөбе қаласының тұрғыны Олжас Қожаев.

Балиге саяхат ұйымдастырамын деп жарнамалаған Салтанат есімді келіншек екен. Оның авторлық турына Ақтөбенің өзінде он шақты адам төлем жасаған. Олар бүгін орталық алаңға жиналып, келіншекті жауапқа тартуды талап етті.

Сөйтсе, жалғыз Ақтөбеден емес, өзге өңірлердің тұрғындары да дәл осы турға ақша аударған. Саяхатқа бара алмай қалғандар қатарында Алматы мен Астана, Тараз, Өскемен тұрғындары көп. 

Олардың бәрі қаңтарда жылы жақта демалуды жоспарлаған. Алайда,  не жолдама, не ақша жоқ болып шықты. Ал полицейлер елді сан соқтырған Салтанат есімді келіншектің үстінен іс қозғалғанын мәлімдеді.

Алаяқтық жасау дерегі бойынша туристік агенттік иесіне қатысты қылмыстық іс қозғалды. Жәбірленші ретінде үш отбасы өтіп жатыр. Сотқа дейінгі тергеп тексеру барысында Ақтөбе қаласында орналасқан туристік агенттік иесі шетелге демалыс демалыс ұйымдастырып беруге уәде етіп, олардың алдын ала ақшасын алған, - деп мәлімдеді Ақтөбе облыстық ПД баспасөз қызметінің жетекшісі Ерболат Сарқұлов.