Журналист Заңғар Кәрімхан Facebook-тегі парақшасында СҚО-да Міржақып Дулатовқа арналған мемориалды кешен ашылуға санаулы күндер қалғанда қирап қалғанын айтты, деп хабарлайды bairaqmedia.kz.
«Бүгін Алаштың көрнекті қайраткері, жазушы-журналист, ұлт ұранының авторы Міржақып Дулатұлының туған күніне 140 жыл толып отыр. Көпшілік аруағын еске алып, есімін атап жатыр. Дегенмен, осыған байланысты алаңдататын бір жайт бар.
1917 жылғы ІІ жалпы қазақ-қырғыз құрылтайынан кейін елді қорғау мақсатында жер-жерде әскерге жігіттер жинау ісі қолға алынды. Сол кездері Міржақып Дулатұлы мен заңгер Айдархан Тұрлыбайұлы Қызылжар маңындағы Аққұсақ жерінде төтенше жиын өткізген. 1918 жылғы шілдедегі бұл жиында халыққа Алаш идеясы түсіндіріліп, елді қорғау қажеттігі айтылған.
107 жыл өткен соң, осы аймақта – қазіргі Жамбыл ауданы Петровка ауылы маңында, мемлекеттік бюджет қаражатынсыз, тек жеке кәсіпкерлердің, оның ішінде Алаш қайраткерлерінің ұрпақтарының қолдауымен мемориалдық кешен бой көтерді. Биіктігі 28 метрге жететін ескерткіш заманауи инженерлік-архитектуралық талаптарға сай салынған. Оның ашылуы 27 қыркүйекте жоспарланған еді.
Алайда ұйымдастырушылардың айтуынша, кешен қасақана қиратылған. Ұшар басындағы қыран бейнесі, айналасындағы шам бағандары мен мемориалдық тақталар сындырылып, бүлінген. Жағдайды жасауға Солтүстік Қазақстан облысының әкімдігі қатысқан, техника, крандар және жұмысшылар жіберілген.
Бұл әрекеттің себебі әлі белгісіз. Кей ақпарат көздері әкімдік Алаш партиясына және Алаш Орда үкіметіне қатысты мұндай ескерткіштер орнатылмауы керек деп шешкенін айтады. Дегенмен, кешенді толық жоюға күштері жетпеген көрінеді.
Журналист Заңғар Кәрімханның пікірінше, бұл жағдай мемлекеттің, қоғамның, әсіресе тарихқа құрметтің алдында үлкен сын. Облыс әкімдігі кемшілікті жойып, ескерткішті қалпына келтіріп, ашылуын дұрыс ұйымдастыруы тиіс. Бұл тек Міржақып Дулатұлымен ғана байланысты емес, сондай-ақ Алаш қайраткерлерінің рухына да құрмет болып табылады.
Қоғамдық резонанс туғызу, пікірталас ашу маңызды. Бұл жағдайға бей-жай қарау – тарих пен мәдениетке деген немқұрайдылық», - деп жазды ол.
