Глубокое ауданында заманауи тау шаңғысы кешені мен «Таулы Үлбі» экопаркі ашылады. Ірі инвестициялық жоба аймақтың туристік әлеуетін жаңа деңгейге көтермек, деп хабарлайды Bairaqmedia.kz.
Шығыс Қазақстан облысының туризм саласы жақын жылдары айтарлықтай трансформациядан өтпек. Өңірдің табиғи мүмкіндіктерін тиімді пайдалану мақсатында Глубокое ауданында ауқымды инвестициялық жобалар қолға алынуда. Солардың ішіндегі ең ірісі – Таулы Үлбі аумағында бой көтеретін заманауи тау шаңғысы курорты. Бұл туралы ШҚО Өңірлік коммуникациялар қызметі алаңында өткен баспасөз мәслихатында Глубокое ауданының әкімі Эльдар Тұмашинов мәлімдеді. Аудан басшының сөзіне сүйенсек, аталған бастама аймақтың экономикалық өсіміне және жаңа жұмыс орындарының ашылуына тікелей ықпал етеді.
Инвестиция және инфрақұрылым: «The Forest» базасындағы жаңа курорт
«2026 жылы Жалпыұлттық инвестициялық жобалар пулына енгізілген негізгілердің бірі – Таулы Үлбі ауылындағы «The Forest» ,мейрамханасы базасында тау шаңғысы курортын салу. Жобаның жалпы құны 30 миллиард теңгені құрайды. Бұл бағыттағы жұмыстар өңірге инвесторлардың қызығушылығын арттыруға бағытталған», - деп атап өтті аудан әкімі.
Жаңа тау шаңғысы курорты халықаралық стандарттарға сай жабдықталады. Жоба аясында келесі инфрақұрылымдық нысандардың құрылысы жоспарланған: әртүрлі күрделілік деңгейіндегі екі заманауи шаңғы трассасы, келушілерге жайлы демалыс сыйлайтын 41 нөмірлі қонақүй, денсаулықты оңалтуға арналған ірі SPA-орталық, сонымен қатар арнайы қызмет көрсету орындары мен демалыс нысандары болады деп күтіледі.
Бұдан бөлек, курорт іске қосылған кезде жергілікті тұрғындар үшін 20-дан астам тұрақты жұмыс орны ашылады. Бұл ауылдық аймақтардағы жұмыссыздық мәселесін шешуге септігін тигізеді.
«Таулы Үлбі» экопаркі: Табиғат аясындағы белсенді демалыс
Глубокое ауданында туризмді дамытудың тағы бір басым бағыты – экологиялық туризмді өркендету. Осы орайда аудандағы ең ауқымды бастамалардың бірі ретінде «Таулы Үлбі» эко-саябағын құру жобасы аталып өтті. Жоба тұжырымдамасына сәйкес, жалпы аумағы 40 гектарды құрайтын бірегей рекреациялық-туристік аймақ құрылады.
Экопарк аумағында келушілер үшін барлық жағдай жасалады. Мұнда балалар ойын алаңдары, спорттық аймақтар, тамашалауға арналған арнайы көрініс алаңдары мен терренкур жолдары салынады. Саябақ бір мезетте 2 000-нан астам адамды қабылдай алады. Жобаны ресми түрде іске асыру мерзімі 2026 жылдың үшінші тоқсанына жоспарланған.
Сонымен қатар, аймақтағы эко-туризмді қолдау мақсатында «Заречье Эко Лэнд» ЖШС тарапынан Быструха ауылындағы экобазаны кеңейту жұмыстары жүргізілуде. Бұл жобаға салынатын инвестиция көлемі 1 миллиард теңгеден асады.
ШҚО туризміндегі Глубокое ауданының үлесі
Бүгінгі таңда Глубокое ауданы Шығыс Қазақстан облысының негізгі туристік драйверлерінің біріне айналып отыр. Қазіргі уақытта ауданда 21 туристік нысан жыл бойы үзіліссіз қызмет көрсетілсе, жыл сайын бұл өңірге шамамен 102 мың турист келеді.
Статистикалық мәліметтерге сүйенсек, Глубокое ауданына келетін саяхатшылардың үлесі облыста қызмет көрсетілген жалпы туристер санының 22 пайызынан астамын құрайды. Жаңадан салынатын 30 миллиард теңгелік тау шаңғысы курорты мен жаңа экопарк іске қосылғаннан кейін бұл көрсеткіш еселеп өседі деп күтілуде. Мемлекеттік қолдау мен жеке инвестициялардың үйлесімі ШҚО-ны тартымды мекенге айналдырады.
