Қазақстандықтардың Қатар мемлекетінде жұмысқа орналасу жөніндегі келісім күшіне енді, деп хабарлайды еңбек және халықты әлеуметтік қорғау министрлігі.
Екі ел үкіметі арасында қазақстандық жұмыскерлердің осы елде жұмысқа орналасуын реттеу туралы келісім күшіне енді. Келісімді растайтын жазбаша хабарламаны Қатар Сыртқы істер министрлігі жіберген.
Айта кетейік, құжатқа былтыр 14 ақпанда Қасым-Жомарт Тоқаевтың Дохаға ресми сапары барысында қол қойылды. 2025 жылы келісімді ратификациялау туралы Заң жобасын парламенттің қос палатасы мақұлдады. Ал 20 қазанда Заңға президент қол қойды.
Келісім аясында Қазақстан азаматтары Катарда қауіпсіз әрі ашық түрде жұмысқа орналасып, құқықтық және әлеуметтік тұрғыдан қорғалады.
"Құжат мамандарды іріктеуге өтінімдер алмасуға, олардың біліктілігін тексеруге және еңбек шарттарын жасасуға нақты тәртіп бекітеді. Келісім қазақстандық жұмыскерлерге үлгілік еңбек шартына сәйкес ұшуға, тұрғын үйге және медициналық қызмет көрсетуге ақы төлеу, еңбектің, демалыстың және сыйақының нақты шарттары, шартты мерзімінен бұрын бұзған кездегі жұмыскерлердің мүдделерін қорғауды қоса алғанда әлеуметтік және еңбек құқықтарына кепілдік береді", - дейді министрлік.
Келісім нормаларының орындалуын бақылау үшін екі ел еңбек министрлігінің өкілдерінен бірлескен комитет құрылатын болады.
Қатарлық жұмыс берушілер ұсынатын барлық бос орындар migration.enbek.kz порталында орналастырылады. Қазақстан азаматтарына Қатар мемлекетіндегі еңбек мүмкіндіктеріне ашық және ресми қолжетімділікті қамтамасыз етеді.
2025 жылғы 9 айдың қорытындысы бойынша шетелде 156,7 мың қазақстандық жұмыс істеп жатыр.
