Төтенше жағдайлар министрлігі қазақстандықтарға көпқабатты тұрғын үй және әкімшілік ғимараттарда өрт шыққан кездегі эвакуация ережелерін қатаң сақтау керек екенін еске салды, деп хабарлайды bairaqmedia.kz.

Ведомствоның мәліметінше, биік үйлерде тығыз қоныстану, күрделі жоспарлау және желдету жүйелері түтіннің жылдам таралуына әкеледі, сондықтан адамдардың әр қадамы алдын ала ойластырылған болуы маңызды.

Өрт кезінде ең алдымен не істеу керек?

Үрейге бой алдырмаңыз. ТЖМ мамандарының айтуынша, ең маңыздысы – сабыр сақтау.

• Жағдайды тез бағалаңыз, бірақ абыржымай әрекет етіңіз.
• Эвакуацияны кідіріссіз бастаңыз, бірақ асығып, өзіңізге және өзгелерге қауіп төндірмеңіз.
• Пәтерден шыққанда есікті мықтап жабыңыз – бұл жалын мен түтіннің таралуын баяулатады.

Лифт пайдалануға болмайды

Министрлік өрт кезінде лифт қолдануға қатаң тыйым салынатынын тағы ескертеді.

«Электр қуаты өшіп, лифт шахтада тоқтап қалуы мүмкін. Лифт шахтасы түтін мен ыстық ауаның тез тарайтын каналына айналады», – делінген хабарламада.

Эвакуация үшін тек баспалдақ алаңындағы эвакуациялық шығу жолдарын пайдалану керек. Ғимараттағы жарықтандырылған белгілер мен эвакуация сызбасына назар аударыңыз.

Түтін басқан кезде қалай қозғалу керек?

Егер дәлізде немесе сатыда түтін болса:

• Еденге жақынырақ еңкейіп немесе еңбектеп қозғалған дұрыс, себебі төменгі қабатта түтін мен улы газдардың концентрациясы аздау болады.
• Аузыңыз бен мұрныңызды дымқыл мата, орамал, шүберекпен жауып алыңыз.

Шығу жолы жабық болса не істейміз?

Кейде өрт немесе түтін баспалдаққа шығу жолын толық жауып тастауы мүмкін. Мұндай жағдайда пәтерде немесе бөлмеде қалып, есікті жабыңыз. Есіктің саңылауларын сулап алынған мата, шүберекпен бітеп, түтіннің ішке кіруін барынша азайтыңыз.

Балконға немесе терезе жанына шығып, құтқарушылардың назарын аударыңыз– айқайлаңыз, жарық сигнал беріңіз. 112 нөміріне қоңырау шалып, нақты мекенжайды, кіреберіс, қабат, пәтер нөмірін айтыңыз.

Кімдерге бірінші көмектесу керек?

ТЖМ мәліметінше, өрт кезінде:

• Балаларға, қарттарға және жүріп-тұруы қиын адамдарға бірінші көмектесу керек.
• Оларды қауіпсіз жерге дейін қоса ертіп шығу, керек болса көтеріп алып шығу ұсынылады.

Алдын ала дайындық неге маңызды?

Министрлік тұрғындарды өз үйіндегі эвакуация жоспарын алдын ала қарап шығуға, өрт сөндіру және қосалқы шығу есіктерінің қайда орналасқанын білуге, үйде, кеңседе өтетін оқу-жаттығу эвакуацияларына немқұрайды қарамауға шақырады.

Құтқарушылардың айтуынша, өрттің алғашқы минуттарында дұрыс әрекет ету адамның ғана емес, бүкіл подъезд тұрғындарының өмірін сақтап қалуға көмектеседі.