Орал қаласында 14 және 16 жастағы екі жасөспірім көпқабатты тұрғын үйдің төбесінен құлап, көз жұмды. Қайғылы оқиғаға байланысты полиция сотқа дейінгі тергеу бастады, деп хабарлайды Вairaqmedia.kz.
Алдын ала мәлімет бойынша, қайғылы жағдай 6 қазан күні кешкі уақытта қаланың «Строитель» шағынауданында болған.
Жергілікті тұрғындардың айтуынша, көпқабатты тұрғын үйдің маңынан екі жасөспірімнің денесі табылған. Оқиға орнына полиция қызметкерлері келіп, аумақты қоршауға алған.
Қаза тапқандардың бірі 2010 жылы, екіншісі 2012 жылы туған. Жергілікті ақпарат көздерінде олардың бірі колледж студенті, екіншісі мектеп оқушысы болғаны айтылып жатыр. Алайда бұл мәліметтер әзірге ресми түрде расталған жоқ.
Батыс Қазақстан облысының полиция департаменті екі жасөспірімнің қаза тапқанын растады.
«Аталған дерек бойынша сотқа дейінгі тергеу амалдары жүргізіліп жатыр. Қазіргі кезде оқиғаның толық мән-жайы мен себептері анықталуда. Тергеу барысы БҚО полиция департаменті басшылығы мен облыс прокуратурасының бақылауында. Басқа ақпарат Қылмыстық-процестік кодекстің 201-бабына сәйкес жария етуге жатпайды», – деп хабарлады полиция.
Әлеуметтік желілерде жасөспірімдердің көпқабатты үйдің төбесінен секіргені туралы ақпарат тараған. Дегенмен құқық қорғау органдары оқиғаның нақты қалай болғанын және оның себептерін әзірге жариялаған жоқ.
Қазіргі уақытта тергеушілер қайғылы жағдайдың барлық мән-жайын анықтап жатыр. Оқиғаның нақты себебі тергеу нәтижесінде белгілі болады.
