Шымкентте су құбырын ауыстыру жұмыстары кезінде қайғылы оқиға болды. Алдын ала мәлімет бойынша, құдыққа түскен екі жас жұмысшы газға уланып, көз жұмған, деп хабарлайды Вairaqmedia.kz.
Қайғылы жағдай су құбырын ауыстыру жұмыстары барысында болған. Алдын ала ақпаратқа сәйкес, жасы 20–22 шамасындағы екі жігіт жұмыс жүргізу үшін құдыққа түскен.
Болжам бойынша, құдық ішінде жиналған газдан жұмысшылар уланып қалған. Салдарынан екі азамат та қаза тапқан.
Әзірге оқиғаның нақты мән-жайы, жұмысшылардың қандай газдан уланғаны және қауіпсіздік талаптарының сақталған-сақталмағаны туралы ресми мәлімет жарияланған жоқ.
Қайғылы оқиғаның нақты себептері тиісті тексеру нәтижесінде анықталуы тиіс.
Айта кетейік, кәріз және су құдықтары сияқты жабық кеңістіктерде улы газдардың жиналуы немесе оттегінің жетіспеуі адам өміріне үлкен қауіп төндіреді. Сондықтан мұндай орындарда жұмыс жүргізер алдында ауа құрамын тексеру және тиісті қауіпсіздік шараларын сақтау аса маңызды.
