Астанадағы №99 мектептің гардеробында оқушылардың жаппай жиналып, бір-бірін қысып қалғаны туралы ақпарат әлеуметтік желіде тарады. Оқиғадан кейін білім ордасының директоры қызметінен босатылды, деп хабарлады Вairaqmedia.kz Liter.kz басылымына сілтеме жасап.
Әлеуметтік желіде тараған мәліметке сәйкес, сабақ аяқталған соң мектептің киім шешетін бөлмесінде оқушылар көптеп жиналып, кептеліс пайда болған. Оқушылардың айтуынша, кейбір балалар жарақат алған, тіпті арасында тынысы тарылып, құлап қалғандар болған.
Аталған жағдайға қатысты Астана қаласының Білім басқармасы түсініктеме берді.
Ведомство мәліметінше, оқиға сабақ кестесін ұйымдастырудағы сәйкессіздіктен туындаған. Соның салдарынан екінші ауысымда оқитын жеті сыныптың оқушылары сабақтан бір мезгілде шыққан. Нәтижесінде сырт киім сақтайтын орында балалар қысқа уақытқа көптеп жиналып қалған.
«Бейнебақылау камераларының жазбаларын зерделеу нәтижесінде оқушылардың бірінің есінен танып, құлап қалғаны туралы ақпарат расталмады. Қазіргі уақытта мектептің сырт киім сақтайтын аймағында қызметкерлердің кезекшілігі мен бақылауы күшейтілді. Сонымен қатар оқушылардың қауіпсіз қозғалысын қамтамасыз ету үшін қосымша шаралар қабылданды», – деп хабарлады Астана қаласының Білім басқармасы.
Оқиғадан кейін мектеп басшылығына қатысты кадрлық шешім қабылданған.
Атап айтқанда, №99 мектептің директоры атқарып отырған қызметінен босатылды.
Білім басқармасы мектеп аумағында балалардың қауіпсіздігін қамтамасыз ету мақсатында бақылау күшейтілгенін мәлімдеді.
