Петропавл қаласындағы макарон фабрикасында қайғылы оқиға болды. Қамыр илейтін өндірістік құрылғыға тартылып кеткен 35 жастағы жұмысшы оқиға орнында көз жұмды, деп хабарлайды Bairaqmedia.kz КТК телеарнасына сілтеме жасап.
Қайғылы жағдай 12 қазанға қараған түні, жұмысшылар түнгі ауысымда еңбек етіп жатқан кезде болған.
Алдын ала мәлімет бойынша, «Сұлтан-ЭММК» акционерлік қоғамының қызметкері қамыр илейтін құрылғыны тазалап жатқан. Сол сәтте аппарат кенеттен іске қосылып, ер адамды ішіндегі үлкен қалақтары тартып кеткен. Алған жарақаттарынан 35 жастағы жұмысшы сол жерде қаза тапқан. Оқиға марқұмның әріптесінің көз алдында болған. Қасында тұрған жұмысшы дер кезінде шегініп үлгеріп, аман қалған.
Аталған дерек бойынша еңбек қауіпсіздігі талаптарының бұзылуына қатысты қылмыстық іс қозғалды. Қазір мемлекеттік еңбек инспекциясының арнайы комиссиясы тергеу жүргізіп жатыр. Солтүстік Қазақстан облысы бас мемлекеттік еңбек инспекторының орынбасары Азат Көшербаев оқиғаның мән-жайы жан-жақты тексерілетінін мәлімдеді.
«Макарон өнімдерін өндіру барысында «Сұлтан-ЭММК» АҚ-ның престеушісі қайғылы жағдайға тап болды. Комиссия оқиғаның қандай себеппен болғанын, оған кімнің кінәлі екенін, аталған жұмыстың марқұмның қызметтік міндетіне кірген-кірмегенін және қауіпсіздік талаптарының сақталған-сақталмағанын анықтайды», – деді Азат Көшербаев.
Қайғылы оқиғаның нақты себебі мен жауапты тұлғалар арнайы тергеу қорытындысы бойынша анықталады.
