Сейсмологиялық байқау және зерттеулер ұлттық ғылыми орталығының сейсмикалық станциялар желісі 28 наурызда Астана уақытымен 3:42-де жер сілкінісін тіркеді, деп хабарлайды Bairaqmedia.kz.

Жер сілкінісінің ошағы Алматы қаласынан оңтүстік батысқа қарай 323 шақырым жерде, Жамбыл облысының аумағында орналасқан.

Зілзала дүмпуі Жамбыл облысының Меркі ауданында 5 балл деңгейінде сезілді. Құлан ауылында 4 балл, Тараз және Шу қаласы, Қордай, Мойынқұм ауылдарында 2 балдық деңгейде сезілді.

ТЖМ командалық орталығында сейсмикалық жағдайды бақылау бойынша жедел штаб құрылды. Вице-министр Батырбек Әбдішевтің төрағалығымен жұмыс кеңесі және аумақтық бөлімшелермен бейнеконференцбайланыс өткізілді.

Әзірге зардап шеккендер туралы ақпарат түскен жоқ. Тіршілікті қамтамасыз ету объектілері штаттық режимде жұмыс істейді.

Ведомствоның мәлімдеуінше, әзірге жағдай тұрақты. Құтқару бөлімшелері қажет болған жағдайда іске кірісуге дайын. Өңірде орналасқан 5 химиялық нысанға қауіп төнбеген.

Облыс әкімдігі жер сілкінісіне қатысты алдын ала мәліметті жариялады.

Тұрар Рысқұлов ауданы Қарақыстақ ауылындағы мәдениет үйі, Меркі аудандық ауруханасы, Ойтал ауылындағы мектеп ғимаратының қабырғасында жарықтың пайда болғаны анықталды, – делінген хабарламада.

Әкімдіктің мәлімдеуінше, басқа нысандар туралы ақпарат нақтыланып жатыр.

Облыс әкімі Ербол Қарашөкеев жағдаймен танысу үшін Тұрар Рысқұлов және Меркі аудандарына барды.