Қазақстанда мемлекеттік қызметтердің цифрландырылуына байланысты Халыққа қызмет көрсету орталықтары қызметкерлерін жаппай қысқарту жоспарланып отырған жоқ. Бұл туралы Үкіметтегі брифингте Жасанды интеллект және цифрлық даму бірінші вице-министрі Ростислав Коняшкин мәлімдеді, деп хабарлайды Вairaqmedia.kz.
Оның айтуынша, ХҚКО-ға келетін азаматтар саны азайған жағдайда қызметкерлерді жұмыстан шығару емес, басқа бағыттарға қайта бөлу көзделеді. Бұған дейін штат санын оңтайландыру негізінен бос жұмыс орындарын қысқарту және жаңа мамандарды қабылдауға мораторий енгізу арқылы жүргізілген.
Цифрландыруға байланысты ХҚКО-лардың жұмыс форматы да өзгереді. Жаңа кеңселерде өзіне-өзі қызмет көрсету аймақтары көбейіп, құжат рәсімдеуге арналған терминалдар мен eGov GPT жүйесі енгізіледі. Онлайн көрсету мүмкін емес қызметтер үшін бірнеше оператор жұмыс істейді.
Ал ХҚКО мамандарының бір бөлігі азаматтарға кеңес беру, мемлекеттік қызметтердің бизнес-процестерін талдау және оларды жетілдіру бағыттарына қайта даярланбақ.
