Жамбыл облысының Байзақ ауданында жасөспірімдер арасында болған жанжал қайғылы жағдаймен аяқталды. Алдын ала мәлімет бойынша, төбелес кезінде ауыр жарақат алған 15 жастағы мектеп оқушысы кейін көз жұмған, деп хабарлайды Вairaqmedia.kz.
Оқиға Байзақ ауданында болған. Алдын ала дерекке сәйкес, жасөспірімдер арасында жанжал туындап, арты төбелеске ұласқан. Оның барысында 15 жастағы оқушы ауыр дене жарақатын алған.
Өкінішке қарай, жасөспірімді аман алып қалу мүмкін болмаған. Ол алған жарақаттарының салдарынан көз жұмды.
Аталған дерек бойынша қылмыстық іс қозғалды. Жанжалға қатысушылардың бірі ұсталып, уақытша ұстау изоляторына қамалған.
Қазіргі уақытта полиция оқиғаның барлық мән-жайын, жанжалдың неден басталғанын және оған кімдердің қатысқанын анықтап жатыр.
Тергеу жалғасуда. Қылмыстық іс Жамбыл облысы полиция департаменті басшылығының бақылауына алынған.
