Әлеуметтік желілерде радикалды топтар, жалған ақпарат таратушылар мен қылмыстық ұйымдар өз ықпалын күшейтіп келеді. Бұл туралы Қазақстан мұсылмандар діни басқармасы мәлімдеді, деп хабарлайды Bairaqmedia.kz.

Діни басқарманың мәліметінше, әсіресе 14-25 жас аралығындағы жастар суицидті насихаттайтын, экстремистік идеяларды дәріптейтін және есірткі тұтынуға итермелейтін мазмұндарға жиі тап болады. Мұндай ақпараттардың салдарынан жасөспірімдер күйзеліске ұшырап, отбасымен және қоршаған ортамен жанжалға түсіп, тіпті зорлық-зомбылыққа бейімделуі мүмкін.

Интернеттегі қауіпті ақпаратты қалай тануға болады?
Деструктивті ақпарат көбіне:
🔹 Адамдарды екіге бөліп, қоғамда араздық тудыруға бағытталады.
🔹 Тарихи немесе діни мәліметтерді бұрмалап көрсетеді.
🔹 Арнайы манипуляциялық әдістерді пайдаланып, адамдарды өз қатарына тартуға тырысады.
🔹 Қауіпсіздікке нұқсан келтіретін заңсыз әрекеттерді насихаттайды.

Мұндай мазмұндағы ақпаратты көрген жағдайда оны ресми дереккөздерден тексеріп, қажет болса, тиісті органдарға хабарлаған жөн.

Деструктивті ақпараттан қалай қорғануға болады?
🔸 Медиа сауатты болу – ақпараттың шынайылығын тексеріп, сыни тұрғыдан ойлау қабілетін дамыту қажет.
🔸 Антивирус бағдарламаларын пайдалану – қажетсіз және қауіпті ақпараттарды бұғаттайтын қосымшаларды орнату маңызды.
🔸 Бейтаныс адамдармен байланыс жасамау – әлеуметтік желілерде белгісіз адамдармен сөйлесуден сақ болу керек.
🔸 Күмәнді сілтемелерге өтпеу – белгісіз хабарламалардан келген сілтемелерді ашпау қажет.
🔸 Ресми дереккөздерді пайдалану – сенімді ақпарат алу үшін тексерілген ақпарат көздеріне жүгінген дұрыс.

 Діни ақпаратты шекараның арғы жағында отырған беймәлім ұстаздардан, белгісіз сайттардан үйренуге болмайды. Діни мағлұмат алам деушілерге Қазақстан мұсылмандары діни басқармасының muftyat.kz сайты бар екенін еске салғымыз келеді. Біз бірге сыйластық пен өзара түсіністікке негізделген үйлесімді қоғам құру арқылы деструктивті ақпараттың барлық түрінен бас тарта аламыз, – деді басқарма өкілдері.