Алматыда «Жасанды интеллект әліппесі» кітабының тұсаукесері өтті. Туынды қарқынды дамып келе жатқан жаңа сала туралы алғаш рет қазақ тілінде жазылған түпнұсқа болуымен ерекшеленеді, деп хабарлайды Bairaqmedia.kz.
Іс-шара барысында TurkAI – түркі мемлекеттерінің жасанды интеллектшілер қауымдастығының құрылғаны хабарланды. Сондай-ақ салалық AI-hub компаниясы мен ai-hub.kz сайты таныстырылды.
Бастамашы топтың айтуынша, еліміздің аталған сала көшінен қалмауы үшін екі жыл бұрын қазақ тілді аудиторияға арнап арнайы еңбек жазуға кіріскен.
Еңбек – бағдарламалауды білмейтін, бірақ AI мүмкіндіктерін зерттеп, қолданғысы келетін адамдарға арналған. Жасанды интеллект саласындағы негізгі ұғымдарды қарапайым тілмен түсіндіреді. Қазірдің өзінде сұраныс өте жоғары болғандықтан, кітапты екінші басылымға жіберіп жатырмыз, – деді саланы зерттеп жүрген кітап авторы – жасанды интеллект және IT технология саласының сарапшысы, журналист Мейіржан Әуелханұлы.
Кітап туралы белгілі педагог Өмірбек Шыныбекұлы да ойын бөлісті.
Осы кітапты Оқу-ағарту министрлігінің сарапшылары қарап шығып, қосар-алар тұстары болса, автормен жұмыс істеп, мектептерге тарату керек. Жасанды интеллект дәуірінде оны дұрыс қолдану, промптарды дұрыс жазу әдісі маңызды деп ойлаймын, – деп салалық министрге ұсыныс жасағанын атап өтті Өмірбек Шыныбекұлы.
Кітап Орталық Азия елдерінде жасанды интелект саласына қатысты алғаш шыққандықтан Өзбекстан, Қырғызстан елдерінен аударуға ұсыныстар түскен.
Іс-шара аясында жаңа құрылған «AI-HUB» компаниясының мақсаты айтылды. Оның басшысы Ержанар Әшейханның сөзінше, компания – жасанды интеллект, IT, кибер және ақпараттық қауіпсіздік, ақпараттық және цифрлық технологиялар, сондай-ақ биотехнологияларды зерттеу мен дамытуға бағытталған бірегей ұйымға айналуды көздейді. Негізгі мақсаты – озық технологияларды түрлі салаларға енгізу, халықтың цифрлық және ақпараттық сауатын арттыру, сондай-ақ салалық стартаптарды қолдау.
Жасанды интеллектке қатысты алғаш рет оқулық басып шығарған Ai-Hub publishing баспасы болса, алдағы уақытта жаратылыстану, IT мен жасанды интеллект саласына қатысты әлемдегі танымал кітаптарды қазақша аудармақ. Сонымен қатар, сала ғалымдары, мамандарымен бірлесе отырып балаларға, оқушылар мен студенттерге арналған оқулықтар мен әдістемелер әзірлеуді көздеп отыр. Сондай-ақ жасанды интеллект терминдерін жасау мен энциклопедиясын қазірден бастап дайындауды қолға алмақ.
Сондай-ақ «AI-HUB» компаниясының негізін қалаушылардың бірі Нұрболат Нышанбаев түркі мемлекеттері жасанды интеллект саласы өкілдерінің басын қосатын TurkAI қауымдастығы құрылып, бауырлас елдермен бірлескен жұмыстар күшейтілетіні хабарланды. Жиынға Түркі елдерінен және Еуропадан жасанды интелект саласында жұмыс істейтін компания басшылары онлайн қатысып, өз пікірлерін білдірді.
Ұйымдастырушылар алдағы уақытта кітаптың тұсаукесері Астана қаласы мен барлық облыс орталықтарында өтетінін хабарлады.
