Алматыдағы массаж салондарының бірінде 18 жастағы бойжеткенге жыныстық сипаттағы зорлық жасауға әрекеттенді деген ақпарат әлеуметтік желіде тарады. Қыздың туысы болған жағдайды жариялап, полицияға арыз берілгенін мәлімдеді, деп хабарлайды Bairaqmedia.kz Azattyq Rýhy басылымына сілтеме жасап.
Жазба авторының айтуынша, дәрігердің кеңесімен массажға жазылған бойжеткен 2 қарашада алғашқы процедураға барған. Сол кезде массаж жасаушы ер адам оған тиіспек болған. Қыз қашуға әрекеттенгенде, күдікті оны тұншықтыра бастаған деген мәлімет бар. Оқиғадан кейін бойжеткен ата-анасымен бірге полицияға арыз түсірген. Туысының сөзінше, ер адам бастапқыда ұсталып, кейін босатылған.
«Ол қазір бостандықта жүр, бұл дұрыс емес. Мен бұл жағдайды бәрі білгенін қалаймын», – деп жазды қыздың туысы.
Алматы қалалық Полиция департаменті арыз бойынша тексеру жүргізіліп жатқанын растады.
«Ер адам Бостандық ауданының полиция басқармасына жеткізілді. Қазіргі уақытта оқиғаның барлық мән-жайы анықталып жатыр. Тексеру нәтижесі бойынша Қазақстан Республикасының заңнамасына сәйкес шаралар қабылданады», – деп хабарлады полиция.
Әзірге ер адамның кінәсі анықталған жоқ. Оқиғаның нақты мән-жайы тексеру нәтижесінде белгілі болады.
