Украинаның бірқатар өңіріне Ресей тарапынан жаппай дрон шабуылы жасалды. Киевтің орталығындағы Украина Ұлттық ғылым академиясының ғимараты да соққыға ұшырады, деп хабарлады Вairaqmedia.kz Reuters агенттігіне сілтеме жасап.
28 қыркүйекте жасалған шабуылдардан Украина аумағында кемінде 9 адам қаза тауып, 80-нен астам адам жараланғанын президент Владимир Зеленский мәлімдеді. Кейінгі деректерде қаза тапқандар саны кемінде 10 адамға жеткені хабарланды.
Киев орталығындағы Ұлттық ғылым академиясының ғимаратына дрон соғылып, екі адам қаза тапты. Қала әкімі Виталий Кличконың мәліметінше, елордадағы бірнеше шабуылдан 24 адам жарақат алған, олардың алтауы ауруханаға жеткізілген.
Шабуылдар Киевпен ғана шектелмеген. Днепр қаласындағы бизнес-орталыққа жасалған соққыдан үш адам қаза тауып, 19 адам жараланған. Сондай-ақ басқа өңірлердегі азаматтық және инфрақұрылым нысандарына зақым келгені хабарланды.
Украина билігінің мәліметінше, Ресей соңғы апталарда жылдам әрі жоғары биіктікте ұшатын реактивті дрондарды көбірек қолдана бастаған. Зеленскийдің айтуынша, соңғы шабуылда Украинаға бағытталған 120 дронның 90-ы реактивті болған. Оларды әуе қорғанысы жүйелерімен атып түсіру қиынырақ болып отыр.
Украина президенті жаңа дрон тосқауылдағыштары сынақтан өткізіліп жатқанын және олардың тиімділігін арттыру жұмыстары жалғасатынын мәлімдеді.
Ресей Қорғаныс министрлігі бұған дейін Украинадағы соққылардың әскери инфрақұрылыммен байланысты нысандарға бағытталғанын мәлімдеген. Reuters бұл мәлімдемелердің барлығын тәуелсіз түрде растай алмағанын атап өтеді.
