"وتباسى بانك" 2025 جىلدىڭ 12 جەلتوقسانىنان باستاپ پلاستيكالىق وپەراسيالارعا زەينەتاقى قاراجاتىن پايدالانۋعا سالىنعان تىيىم كۇشىنە ەنەتىنىن حابارلادى، دەپ جازادى bairaqmedia.kz.

"وپەراسيادان كەيىنگى تىرتىقتاردى جانە تۋا بىتكەن اقاۋلاردى تۇزەتۋگە ارنالعان رەكونسترۋكتيۆتى جانە پلاستيكالىق وپەراسيالارىنا" بجزق قاراجاتىن پايدالانۋ تۋرالى ءوتىنىم قابىلداۋ enpf-otbasy.kz پورتالىندا 2025 جىلدىڭ 12 جەلتوقسانىنان باستاپ توقتاتىلادى"، - دەپ جازىلعان حابارلامادا.

بانكتە حابارلاعانداي، قازىرگى ۋاقىتتا پلاستيكالىق وپەراسيالارعا بزق قاراجاتىن پايدالانۋ بويىنشا 6 294 ءوتىنىم قارالىپ جاتىر.

بۇل وتىنىمدەردىڭ بارلىعى قولدانىستاعى تارتىپكە سايكەس وڭدەلەدى.

جەلتوقساننىڭ العاشقى 8 كۇنىندە، وفتالمولوگياعا ءوتىنىم قابىلداۋ توقتاعاننان كەيىن، پلاستيكالىق وتالارعا بزق پايدالانۋ بويىنشا 2 093 ءوتىنىش تۇسكەن. بۇل – بۇرىنعى ايلىق ورتاشا كورسەتكىشتەن 130 ەسە كوپ. جەلتوقسان ايىنداعى وتىنىمدەردىڭ جالپى سوماسى 1،8 ملرد تەڭگەگە جەتتى.

"بۇرىن بانككە پلاستيكالىق وتالارعا بزق قاراجاتىن پايدالانۋ تۋرالى ازاماتتاردان ورتا ەسەپپەن 16 ءوتىنىش تۇسكەن. الايدا قىركۇيەكتە ستوماتولوگيا بويىنشا ءوتىنىم قابىلداۋ توقتاعان كەزدە ولاردىڭ سانى 123-كە دەيىن ءوستى، قازاندا – 1 844-كە، ال قاراشادا – 3 878 وتىنىشكە جەتتى"، - دەيدى ۆەدومستۆوداعىلار.

بانكتەگىلەر سونىمەن قاتار ازاماتتاردا وزدەرىنىڭ زەينەتاقى جيناقتارىنىڭ ءبىر بولىگىن ومىرلىك ماڭىزدى، قۇنى جوعارى جانە ءاردايىم قولجەتىمدى بولا بەرمەيتىن ەم تۇرلەرىنە باعىتتاۋ مۇمكىندىگى ساقتالاتىنىن حابارلادى.

مۇنداي مەديسينالىق قىزمەتتەرگە مىنالار جاتادى:

سيرەك (ورفاندىق) اۋرۋلاردى ەمدەۋ؛

راديونۋكليدتىك جانە راديويود تەراپياسى؛

راديوحيرۋرگيالىق ەمدەۋ؛

پروتوندىق تەراپيا.

بۇدان بولەك، ازاماتتار زەينەتاقى ارتىلعان قاراجاتتى تۇرعىن ءۇي جاعدايىن جاقسارتۋعا پايدالانا الادى:

تۇرعىن ءۇي ساتىپ الۋ، يپوتەكانى تولىق نەمەسە جارتىلاي وتەۋ، سونداي-اق وتباسى بانكتەگى دەپوزيتتى تولىقتىرىپ، كەيىن باسپانا الۋعا مۇمكىندىگى بار.