الەمدەگى ەڭ باي 500 ادامنىڭ جيىنتىق بايلىعى اقش پرەزيدەنتى دونالد ترامپ جاريالاعان كەدەندىك تاريفتەردەن كەيىن الەمدىك نارىقتاعى كۇيرەۋگە بايلانىستى 208 ميلليارد دوللارعا قىسقاردى، دەپ حابارلايدى Bairaqmedia.kz.

Bloomberg Billionaires Index (BBI) دەرەكتەرىنە سۇيەنسەك، بۇل – يندەكستىڭ 13 جىلدىق تاريحىنداعى ءبىر كۇن ىشىندە تىركەلگەن ءتورتىنشى ءىرى قۇلدىراىۋ جانە COVID-19 پاندەمياسىنان بەرگى ەڭ اۋقىمدىسى. تىزىمگە ەنگەن ميللياردەرلەردىڭ جارتىسىنان كوبى بايلىعىن ورتا ەسەپپەن 3،3%-عا جوعالتقان.

ەڭ كوپ شىعىنعا ۇشىراعاندار — امەريكالىق ميللياردەرلەر. ولاردىڭ ىشىندە Meta كومپانياسىنىڭ باسشىسى مارك سۋكەربەرگ پەن Amazon نەگىزىن قالاۋشىسى دجەفف بەزوس ەرەكشە اتالادى. اگەنتتىك مالىمەتىنشە، مەكسيكانىڭ ەڭ باي ادامى كارلوس سليم سول بايانداۋشىلاردىڭ اراسىندا تەرىس اسەردەن امان قالعان ساناۋلى ميللياردەرلەردىڭ ءبىرى بولدى.

ەڭ ءىرى شىعىندى مارك سۋكەربەرگ شەكتى — Meta اكسيالارىنىڭ 9%-عا تومەندەۋى ونىڭ بايلىعىن 17،9 ميلليارد دوللارعا ازايتتى. Amazon اكسيالارىنىڭ ءدال وسىنداي دەڭگەيدە قۇلدىراۋى دجەفف بەزوستىڭ بايلىعىن 15،9 ميلليارد دوللارعا قىسقارتتى. ال Tesla باسشىسى يلون ماسك كومپانيا اكسيالارىنىڭ 5،5%-عا ارزانداۋىنان 11 ميلليارد دوللار جوعالتتى.

ەسكە سالا كەتسەك، اقش پرەزيدەنتى دونالد ترامپ 2 ساۋىردە 185 ەل مەن اۋماقتان كەلەتىن تاۋارلارعا كەدەندىك تاريفتەر ەنگىزەتىنىن مالىمدەگەن بولاتىن. ول يمپورتتىق تاۋارلارعا مينيمالدى 10% مولشەرىندە باج سالىعىن ەنگىزەتىنىن ايتتى. كەيبىر ەلدەر ءۇشىن جەكە تاريفتەر بەلگىلەنگەن. سونىڭ ىشىندە قازاقستان تاۋارلارىنا باج سالىعىن 27%-عا ءوسىردى.

بۇل رەتتە ەلىمىزدىڭ ساۋدا جانە ينتەگراسيا مينيسترلىگى جاڭا تاريفتەرگە قاتىستى مالىمدەمە جاسادى.