قاراعاندى وبلىسىنا جۇمىس ساپارى اياسىندا توتەنشە جاعدايلار ءمينيسترى، گەنەرال-مايور شىڭعىس ءارىنوۆ «Qarmet» اق-نىڭ كومىر جانە بولات دەپارتامەنتتەرىنە قاراستى نىسانداردى ارالادى، دەپ حابارلايدى bairaqmedia.kz.

ساپار بارىسىندا ۆەدومستۆو باسشىسى كومپانيا شاحتالارىندا ەنگىزىلگەن پوزيسيالاۋ جۇيەسىمەن تانىستى. بۇل زاماناۋي تەحنولوگيالىق شەشىمدەر كەنشىلەردىڭ ناقتى ۋاقىت رەجيمىندە ورنالاسقان جەرىن باقىلاۋعا مۇمكىندىك بەرەدى. بۇل ولاردىڭ قاۋىپسىزدىگىن قامتاماسىز ەتۋ جانە توتەنشە جاعداي تۋىنداعان جاعدايدا جەدەل ارەكەت ەتۋ ءۇشىن اسا ماڭىزدى.

شىڭعىس ءارىنوۆ «ساران» شاحتاسىنا ءتۇسىپ، 540 مەترلىك گوريزونتتا ورنالاسقان كومىر قازۋ كومباينىنىڭ جۇمىسىن كورىپ، كەنشىلەردىڭ ەڭبەك جاعدايىمەن تانىستى.

مينيستر كومىر دەپارتامەنتىنىڭ ديسپەچەرلىك-اناليتيكالىق ورتالىعىنىڭ جۇمىسىنا ەرەكشە نازار اۋداردى. بۇل جەردە شاحتالاردىڭ جاعدايى تاۋلىك بويى باقىلانىپ، ونەركاسىپتىك قاۋىپسىزدىك ەرەجەلەرىنىڭ ساقتالۋى تەكسەرىلەدى جانە توتەنشە جاعدايلار كەزىندە جەدەل باسقارۋ جۇزەگە اسىرىلادى.

سودان سوڭ شىڭعىس ءارىنوۆ «Qarmet» اق بولات دەپارتامەنتىنە قاراستى ىستىق مىرىشتاۋ جانە اليۋمينييلەۋ سەحىنىڭ جۇمىسىمەن تانىستى. سونىمەن قاتار مينيستر وندىرىستىك پروسەستەر مەن ونەركاسىپتىك قاۋىپسىزدىكتى قامتاماسىز ەتۋ شارالارىن قاراپ شىقتى.