«سالتانات» مەملەكەتتىك بي ءانسامبلىنىڭ 70 جىلدىعىنا ارنالعان «بي كەرۋەنى» اتتى مەرەكەلىك كونسەرت تاراز قالاسىندا جوعارى دەڭگەيدە ءوتتى، - دەپ حابارلايدى bairaqmedia.kz
كەشتىڭ شىمىلدىعى ۇلتتىق رۋحتى ۇلىقتايتىن “ەل سالتاناتى” بي قويىلىمىمەن اشىلىپ، كورەرمەندەردى بىردەن ەرەكشە اسەرگە بولەدى.
كەشىمىزدىڭ قوناعى ق ر مادەنيەت قايراتكەرى، «قۇرمەت» وردەنىنىڭ يەگەرى، ءانشى ءومىرقۇل اينيازوۆ "قازاقستان-اتامەكەنىم"، "ءبىر شاۋگىم شاي" اندەرىمەن كورەرمەن ىقىلاسىنا بولەندى. سونىمەن قاتار، حالىقارالىق جانە رەسپۋبليكالىق بايقاۋلاردىڭ لاۋرەاتى جاينا تارعىنوۆا دا ءوز ونەرىن پاش ەتىپ، حالىق ءانى "اق ەركە"، عاريفوللا قۇرمانعالييەۆتىڭ ءانى "ءانشى داۋىسى" تۋىندىسىن ورىنداپ، ەرەكشە سەزىمگە بولەدى. «دارىن» مەملەكەتتىك جاستار سىيلىعىنىڭ لاۋرەاتى، كۇيشى تاڭات سادەنوۆ قاسيەتتى قارا دومبىرا ۇنىمەن تاراز اسپانىن تەربەتتى.
قازاقتىڭ جانە ءتۇرلى ۇلتتىڭ بي قويىلىمدارى كورەرمەن جۇرەگىنە جول تاۋىپ، سالتاناتتى كەشتىڭ كوركىن اشتى.
تاريحي تامىرى تەرەڭ، مادەنيەتى مەن رۋحانياتى باي قاسيەتتى مەكەن، كيەلى جامبىل جەرىنىڭ تۇرعىندارى كەش سوڭىندا «سالتانات» انسامبلىنە ءوز ريزاشىلىعىن ءبىلدىرىپ، ۇلتتىق ونەرگە دەگەن شەكسىز قۇرمەتىن كورسەتتى.
ايتا كەتەيىك، «بي كەرۋەنى» جوباسى اياسىندا تارازدا بي ونەرىنىڭ مايتالماندارىمەن شەبەرلىك ساعاتتارى وتكىزىلدى. جامبىل وبلىسىنان جينالعان قاتىسۋشىلارعا تەگىن سەرتيفيكاتتار تابىستالدى. بۇل يگى شارا الداعى ۋاقىتتا جالعاسىن تابادى.
وسىنداي مازمۇندى ءارى ءماندى كەشتىڭ جوعارى دەڭگەيدە وتۋىنە قولداۋ كورسەتكەن ق ر مادەنيەت جانە اقپارات مينيسترلىگىنە، كەنەن ازىربايەۆ اتىنداعى جامبىل وبلىستىق فيلارمونياسىنا، تاراز قالاسىنىڭ تۇرعىندارى مەن قالا قوناقتارىنا زور العىسىمىزدى بىلدىرەمىز!
