ماڭعىستاۋ وبلىستىق ءماسليحاتىنىڭ ەكس-دەپۋتاتى ىنتاش ناۋرىزوۆا كوپشىلىكتەن كومەك سۇراپ، تاعى ۇندەۋ جاسادى، دەپ حابارلايدى bairaqmedia.kz.

ەكس-دەپۋتاتتىڭ ايتۋىنشا، ول مەن اكىم نۇرداۋلەت قيلىبايدىڭ ورتاق بالاسى بار. 

«ادايدىڭ قىزىمىن، قوسايدىڭ ۇرپاعىمىن. ءوزىمدى باسىندىرىپ قويۋدان شارشادىم، قانشا مىقتى بولۋعا تىرىسسام دا قولىمنان كەلمەي جاتىر. قاتەلىگىمدى مويىندادىم. 3 جاسار ۇلىم امىرەنىڭ قۇقىعىن قورعاپ ءجۇرمىن. 10 ماۋسىمدا سوتقا بەردىم، ودان بەرى ەكى اي ءوتتى، ءالى ەش ناتيجە جوق، دنق دا جاساعان جوقپىز»، - دەيدى ەكس-دەپۋتات.

سونداي-اق ول بالاسىنىڭ بولاشاعىنا الاڭدايتىنىن ايتىپ، تەگىنە قاتىستى ءسوز قوزعادى.

«ۇلىم كىشكەنتاي كەزىندە وسى ماسەلەنىڭ ءبارى بىتسە ەكەن دەيمىن، ەسەيگەندە ەش ماسەلە بولماسا ەكەن دەيمىن. بالامنىڭ تەگى بولعانىن قالايمىن، تۋمالاستارىمەن ارالاسسا جاقسى بولار ەدى. بالامنىڭ اكەسىنىڭ اتا-اناسىنىڭ ەش جازىعى جوق، ولار بالاسىن وسىلاي بولسىن دەپ تاربيەلەمەيدى. مەندە بارار جەر، باسار تاۋ قالمادى. كوپ سۇراقتىڭ جاۋابى جوق»، - دەيدى اشىنعان ايەل.

ايتا كەتەيىك، اتالعان جاعدايعا قاتىستى نۇرداۋلەت قيلىباي بۇعان دەيىن، 2024 جىلدىڭ جەلتوقسان ايىندا Orda.kz سايتىنا بەرگەن سۇحباتىندا، جەكە ومىرىنە قاتىستى قاۋەسەتتەرگە يرونيامەن جاۋاپ بەرگەن بولاتىن. 

«جارقىراعاننىڭ ءبارى التىن ەمەس»، — دەگەن اكىم بۇل ءسوزدى كىمگە ارناعانى ناقتى تۇسىنىكسىز كۇيدە قالدى.

ىنتاش ناۋرىزوۆامەن اراداعى ىقتيمال جەكە قارىم-قاتىناس جايلى سۇراققا ول ناقتى جاۋاپ بەرمەي، تەك الەۋمەتتىك جەلىلەردە جازىلعاننىڭ ءبارى شىندىققا جاناسپايتىنىن ايتتى.

بۇگىندە داۋ جاڭا كەزەڭگە وتكەندەي. ەكى اي ۇزىلىستەن سوڭ، ىنتاش ناۋرىزوۆا قوعامدىق الاڭعا قايتا شىقتى.

قازىرگى ۋاقىتتا بۇل ماسەلە بويىنشا رەسمي ورگاندار تاراپىنان تۇسىنىكتەمە بەرىلگەن جوق. قوعامدا بولسا، بۇل وقيعاعا دەگەن قىزىعۋشىلىق ارتىپ كەلەدى.

جەلى قولدانۋشىلارى تاراپىنان ءتۇرلى پىكىرلەر ايتىلىپ جاتىر: ءبىرى اكىمدى قولداسا، ەندى ءبىرى ەكس-دەپۋتاتتىڭ ءسوزىن جاقتاپ وتىر.