بۇگىن شىمكەنت قالاسىنىڭ اكىمى عابيت سىزدىقبەكوۆتىڭ قاتىسۋىمەن ورتالىق كوممۋنيكاسيالار قىزمەتىندە باسپا ءسوز ءماسليحاتى ءوتتى، دەپ حابارلايدى bairaqmedia.kz.

بريفينگ بارىسىندا تىلشىلەر عابيت سىزدىقبەكوۆتەن بۇرىنعى ورىنباسارى رۋسلان بەردەنوۆكە جاسالعان شابۋىل تۋرالى سۇرادى.

قالا اكىمى بۇل تۋرالى ءوزىنىڭ پىكىرىن ءبىلدىردى.

«مەن اكىم رەتىندە قىلمىستىق نەمەسە اكىمشىلىك پروسەستەرگە، كەز-كەلگەن باسقا پروسەسكە ارالاسۋعا قۇقىم جوق. بۇل ءۇشىن ارنايى ورگاندار بار. سوت شەشىمىن قابىلدادى. حەيتتەردىڭ كوپ بولعاندىعى ايتىلدى، مەن ونى حەيتپەن بايلانىستىرمايمىن. ونداي ەشقانداي حەيت بولعان جوق. مۇمكىن، بىرەۋ بىردەڭە ايتقان شىعار»، – دەدى قالا باسشىسى.

قالا اكىمىنىڭ ايتۋىنشا، شىمكەنتتە رەسمي تىركەلگەن 1 ميلليون 200 مىڭ ادام بولسا، نەگىزىندە 2 ميلليوننان استام ادام تۇرادى جانە ولاردىڭ جەكە تۇلعا رەتىندە ءارقايسىسىنىڭ قوعامدا ورىن الىپ جاتقان وقيعالارعا ءوز كوزقاراسى بار.

«ءار كەزدە بىرەۋ بىردەڭە جازادى، ۋاقىتى بار ادامدار بولادى. سوندىقتان مەن سىزدەر ايتقانداي حەيت بولعانىن مويىنداي المايمىن. قاۋىپسىزدىك كۇشەيتىلدى. ارنايى پوليسيا ءبولىمى كۇزەتىپ جاتىر»، – دەپ تۇيىندەدى ءسوزىن عابيت سىزدىقبەكوۆ.