وزبەكستاننىڭ تاشكەنت وبلىسىندا جاس كەلىن نەكەدەن كەيىن نەبارى ءۇش كۇن وتكەندە كوز جۇمدى، دەپ حابارلايدى Anyqtime.kz.
مارقۇمنىڭ اناسى قىزىن بىرەۋلەر بۋىندىرىپ ءولتىردى دەپ سانايدى، ال كۇيەۋىنىڭ تۋىستارى بۇل — وز-وزىنە قول جۇمساۋ دەپ مالىمدەپ وتىر. وقيعا قوعامدا ۇلكەن داۋ تۋعىزدى، ەكى تاراپتىڭ دا ءۋاجى مەن رەسمي ورگانداردىڭ قورىتىندىسى تالقىلانۋدا.
انانىڭ ايتۋىنشا، ول بۇل ماسەلەگە «ميللار» تەلەشوۋىندا نازار اۋدارۋدى وتىنگەن. 3 ساۋىردە قىزى كەلەس قالاسىنا ۇزاتىلعان. كۇيەۋ جىگىتتىڭ جاقىندارى وزدەرىنىڭ اۋقاتتى اۋلەت ەكەنىن ايتىپ، قالىڭدىقتى ۇلىنا بەرۋدى وتىنگەن سوڭ، اناسى ەگجەي-تەگجەي تەكسەرمەي-اق نەكەگە كەلىسىم بەرگەن. «بۇل مەنىڭ جالعىز قىزىم. كۇيەۋىم بولماسا دا، تويعا كەرەكتىنىڭ ءبارىن ءوزىم جاسادىم. مىنە، نەبارى ءۇش كۇن ءوتتى، ماعان تەلەفون سوعىپ: «قىزىڭنىڭ سۇيەگىن الىپ كەت» دەيدى. ءتىپتى ۇيات تا جوق»، — دەيدى ول كۇيىنە سويلەپ.
قايعىلى جاعداي 6 ءساۋىر كۇنى شامامەن ساعات 18:00-دە بولعانى ايتىلدى. اناسى قىزىنىڭ باقىتتى ءومىر ءسۇرىپ جاتقانىن، جاقىندارىنا ۆيدەولار جولداپ، قۋانىپ جۇرگەنىن العا تارتىپ: «مەن ونى تۇنشىقتىرىپ ولتىرگەنىنە سەنىمدىمىن. ول وز-وزىنە قول جۇمسايتىن ادام ەمەس ەدى. قاجەت بولسا، شىندىقتى دالەلدەۋ ءۇشىن زيراتىن اشۋعا دا دايىنمىن»، — دەپ وتىر.
ال كۇيەۋ جىگىتتىڭ تۋىستارى ەشكىمنىڭ كىناسى جوق ەكەنىن ايتادى. «ءىس ءقازىردىڭ وزىندە جابىلعان. سول كۇنى ۇيدە ەشكىم بولعان جوق. تۇسكەنىنە ءۇش كۇن بولعان كەلىندى ەشكىم ولتىرمەيدى عوي»، — دەيدى ەنەسى. مارقۇم تۇرعان ماحاللادا قالىڭدىقتىڭ وتباسى «جاقسى، ۇلگىلى جانۇيا» رەتىندە سيپاتتالعان. جەسىر ايەلدىڭ ەكى بالاسى بار ەكەنى، قىزىن جاقسى وتباسىنا تۇرمىسقا بەرۋ ءۇشىن قولدان كەلگەننىڭ ءبارىن جاساعانى ايتىلادى.
رەسمي دەرەك بويىنشا، باس پروكۋراتۋرا تەكسەرىس جۇرگىزگەننەن كەيىن مارقۇمنىڭ دەنەسىنەن تۇنشىعۋ بەلگىلەرى انىقتالماعانىن حابارلادى. تاشكەنت وبلىسىنىڭ پروكۋراتۋراسى انانىڭ ارىزىن قاراپ شىققاننان سوڭ، تەرگەۋگە دەيىنگى تەكسەرۋ ناتيجەسىندە وزگە تۇلعالاردىڭ ارەكەتىنەن قىلمىس بەلگىلەرى تابىلماعانىن مالىمدەپ، وسىعان بايلانىستى قىلمىستىق ءىس قوزعاۋدان باس تارتىلعانىن جەتكىزدى.
دەگەنمەن، ەكى تاراپتىڭ قاراما-قايشى مالىمدەمەلەرى قوعامدا رەزونانس تۋدىرىپ، وتباسىلىق-تۇرمىستىق داۋلار مەن ولاردىڭ قۇقىقتىق تۇردە زەرتتەلۋى تۋرالى سۇراقتاردى قايتا كۇن تارتىبىنە شىعاردى. رەسمي قورىتىندى جاريالانعانىمەن، مارقۇمنىڭ اناسى كۇدىگى سەيىلمەگەنىن ايتىپ وتىر.
