سۋ جاڭا «قايسار – ارەنا» ستاديونىنان كەيىن قىزىلوردادا اۋقىمدى جوبا – ەۋروپانىڭ ۇزدىك فۋتبول مەكتەپتەرى ۇلگىسىمەن سالىناتىن «قايسار» فۋتبول اكادەمياسىنىڭ قۇرىلىسى 2026 جىلى باستالماق. اكادەميادا جاس سپورتشىلارعا ارنالعان جاتاقحانا، مەكتەپ، اسحانا جانە جەتى جاتتىعۋ الاڭى قاراستىرىلادى، دەپ حابارلايدى bairaqmedia.kz
قىزىلوردادا كاسىبي فۋتبولدى دامىتۋ باعىتىندا جاڭا ءداۋىر باستالعالى تۇر. «قايسار – ارەنا» ستاديونىنىڭ پايدالانۋعا بەرىلۋى ءوڭىر سپورتىنداعى ماڭىزدى قادام بولسا، ەندى وسى جەتىستىكتى تولىقتىراتىن جاڭا جوبا – «قايسار» فۋتبول اكادەمياسىنىڭ قۇرىلىسى 2026 جىلى قولعا الىنادى.
“جوسپار بويىنشا مۇندا 350 ورىندىق جاتىن عيمارات، زاماناۋي مەكتەپ، كەڭ اسحانا، التى اشىق جانە ءبىر جابىق جاتتىعۋ الاڭى سالىنباق. بۇل ورتالىقتا قىزىلوردالىق جاس فۋتبولشىلار حورۆاتيالىق «دينامو زاگرەب» پەن پورتۋگاليالىق «سپورتينگ» اكادەميالارىنىڭ ەڭ وزىق ادىستەمەسى بويىنشا دايىندالادى”، - دەلىنگەن رەسمي حابارلامادا.
كلۋب جەكەمەنشىككە وتكەننەن كەيىن جاڭا ينۆەستور ينفراقۇرىلىمدىق جاڭعىرتۋدى جىلدام باستاپ، جەرگىلىكتى فۋتبولدى جۇيەلى تۇردە دامىتۋعا كۇش سالۋدا. ال جاڭا اكادەميا بولاشاقتا سىر وڭىرىنەن جاڭا فۋتبول جۇلدىزدارىنىڭ شىعۋىنا مۇمكىندىك بەرەدى.
بۇگىندە قىزىلوردا وبلىسىندا سپورتپەن تۇراقتى شۇعىلداناتىندار سانى 343 مىڭ ادامنان اسىپ، 40،4 پايىزعا جەتكەن. وسى باعىتتاعى جۇمىستىڭ ناقتى ناتيجەسى – قۇنى 26،5 ملرد تەڭگەنى قۇرايتىن 11 مىڭ ورىندىق جاڭا ستاديوننىڭ بوي كوتەرۋى. قالاداعى سول جاعالاۋدا سالىنعان الىپ نىساننىڭ جالپى اۋدانى 20 مىڭ شارشى مەتردى قامتيدى. مۇندا فۋتبول الاڭىمەن بىرگە زاماناۋي تالاپقا ساي بوكس، دزيۋدو، ەركىن جانە گرەك-ريم كۇرەسى، سپورتتىق گيمناستيكا، اۋىر اتلەتيكا، تاەكۆوندو جانە فيتنەس زالدارى ورنالاستىرىلعان.
بارلىق سپورت الاڭدارى حالىقارالىق وليمپيادالىق ستاندارتتارعا سايكەس قۇرال-جابدىقتارمەن قامتىلادى. عيماراتتىڭ ءبىرىنشى قاباتىندا ءتۇرلى سپورت تۇرلەرىنە ارنالعان وقۋ-جاتتىعۋ ورىندارى مەن فۋتبولشىلاردىڭ ارنايى دايىندىق بولمەسى بار. ەكىنشى قاباتتا اكىمشىلىك كەڭسەلەر ورنالاسسا، ءۇشىنشى قاباتتا ۇلكەن جيىندار وتكىزۋگە ارنالعان ءماجىلىس زالى قاراستىرىلعان. سونىمەن بىرگە مۇمكىندىگى شەكتەۋلى سپورتشىلاردىڭ جاتتىعۋىنا قولايلى جاعداي تولىق جاسالعان.
ستاديوننىڭ تاعى ءبىر ماڭىزدى ەرەكشەلىگى – ونىڭ UEFA-نىڭ IV ساناتىنا سايكەستەندىرىلگەنى. جاساندى جابىندى سوڭعى تەحنولوگيالارمەن توسەلىپ، حالىقارالىق تالاپتارعا ساي جارىقتاندىرۋ جۇيەسى ورناتىلعان. بۇل ءوز كەزەگىندە قىزىلوردادا ءىرى حالىقارالىق سپورتتىق جارىستار مەن مادەني شارالاردى جوعارى دەڭگەيدە وتكىزۋگە جول اشادى.
جۋىردا مەملەكەت باسشىسى قاسىم-جومارت توقايەۆ جاڭا ستاديونعا ارنايى بارىپ، نىساننىڭ مۇمكىندىكتەرىمەن تانىستى. پرەزيدەنت «قايسار» فۋتبول كلۋبىنىڭ ويىنشىلارىمەن جۇزدەسىپ، كوماندانىڭ بولاشاعىنا سەنىم ءبىلدىردى.
«قايسار – ەلىمىزدە جەكە مەنشىككە وتكەن العاشقى كلۋبتاردىڭ ءبىرى. الداعى ۋاقىتتا فۋتبول اكادەمياسى سالىنادى. كلۋبتىڭ كەلەشەگى جارقىن بولادى دەپ ويلايمىن»، – دەدى مەملەكەت باسشىسى.
قىزىلوردادا بوي كوتەرىپ جاتقان جاڭا سپورتتىق ينفراقۇرىلىم ءوڭىر سپورتىنىڭ دامۋىنا سەرپىن بەرىپ، جاس بۋىنعا كاسىبي دەڭگەيدە ءبىلىم الىپ، حالىقارالىق ستاندارتتار نەگىزىندە جاتتىعۋعا بىرەگەي مۇمكىندىك اشادى. جاڭا ستاديون مەن الداعى اكادەميا قۇرىلىسى سىر ەلىنىڭ سپورتتىق الەۋەتىن جاڭا بەلەسكە كوتەرەتىنى ءسوزسىز.
