قىرعىزستان تاۋىندا قايعىلى جاعدايدا كوز جۇمعان ءالپينيستىڭ ۇلى ميحايل ناگوۆيسىن الەۋمەتتىك جەلى ارقىلى رەسەيدىڭ باس پروكۋراتۋراسىنا، سىرتقى ىستەر مينيسترلىگىنە جانە قىرعىزستانداعى رەسەي ەلشىلىگىنە جۇگىنىپ، قۇتقارۋ وپەراسياسىن ۇيىمداستىرۋعا كومەكتەسۋدى سۇرادى، - دەپ حابارلايدى Azattyq Rýhy سايتىنا سىلتەمە جاساپ.
ءميحايلدىڭ ايتۋىنشا، جەكەمەنشىك قۇتقارۋشىلار الپينيست ايەلدىڭ ناقتى ورنىن انىقتاۋ ءۇشىن درون قولدانىپ، يتاليالىق ۇشقىشتى تارتۋدى جوسپارلاعان. الايدا اۋا رايى بولجامىنىڭ دۇرىس جاسالماۋىنا بايلانىستى وپەراسيا ىسكە اسپاعان. بۇدان بولەك، اۋا رايىنىڭ قولايلى ءساتىن كۇتىپ، ۇشۋعا دايىن تۇرعان توپ كەنەتتەن تاراتىلىپ جىبەرىلگەن.
«كوماندا دايىن بولدى، تاۋعا كوتەرىلىپ، درون ارقىلى بارلاۋ ۇشىرماق ەدى. ەگەر انامنىڭ ءتىرى ەكەنى انىقتالسا، ارنايى تىكۇشاقپەن قۇتقارۋ وپەراسياسى باستالاتىن ەدى. ءبىراق بەلگىسىز سەبەپپەن 25ء-ى كۇنى تاڭەرتەڭ كوماندانى تاراتىپ جىبەردى. بولدى»، – دەدى ميحايل.
ونىڭ سوزىنشە، قاجەتتى بيىكتىككە درون كوتەرۋگە دايىن ەرىكتى بار، ءبىراق وعان ۇشۋعا رۇقسات بەرىلمەي وتىر. ءقازىر ءالپينيستىڭ ۇلى ەكى ەل بيلىگىنەن وپەراسياعا رۇقسات بەرىپ، اناسىنىڭ ءتىرى ەكەنى راستالعان جاعدايدا بىردەن قۇتقارۋ جۇمىسىن باستاۋدى سۇراپ وتىر.
ايتا كەتەيىك، رەسەيلىك الپينيست ناتاليا ناگوۆيسىنا شىڭعا ورمەلەۋ كەزىندە اياعىنان جاراقات الىپ، ەكى اپتاداي ۋاقىت قىرعىزستانداعى جەڭىس شىڭىندا جالعىز قالدى. بۇعان دەيىن ونى ەۆاكۋاسيالاۋ ارەكەتتەرىنە اۋا رايى كەدەرگى بولعان. سولاردىڭ بىرىندە قىرعىزستان قورعانىس مينيسترلىگىنىڭ تىكۇشاعى قاتتى قونۋعا ءماجبۇر بولىپ، ال باسقا ءبىر الپينيستىك توپتا يتاليالىق سپورتشى لۋكا سينيگاليا قازا تاپقان ەدى.
