مەملەكەت باسشىسى اقىن، قازاقستاننىڭ حالىق جازۋشىسى تەمىرحان مەدەتبەكتىڭ وتباسى مەن جاقىن تۋىستارىنا كوڭىل ايتۋ جەدەلحاتىن جولدادى، دەپ حابارلايدى Bairaqmedia.kz.
پرەزيدەنت قاسىم-جومارت توقايەۆ اقىن، قازاقستاننىڭ حالىق جازۋشىسى، مەملەكەتتىك سىيلىقتىڭ لاۋرەاتى، «قۇرمەت» جانە «پاراسات» وردەندەرىنىڭ يەگەرى، قوعام قايراتكەرى تەمىرحان مەدەتبەكتىڭ دۇنيەدەن وتۋىنە بايلانىستى ونىڭ وتباسى مەن جاقىن-جۋىقتارىنا كوڭىل ايتتى.
تەمىرحان مەدەتبەك عيبراتتى عۇمىرىن ۇلت رۋحانياتىنا ارناعان، ءتول ادەبيەتىمىز بەن ونەرىمىزدىڭ جاناشىرى بولعان تەگەۋرىندى اقىن ەدى. كونە تۇركى سارىنىن جاڭعىرتقان رۋحتى شىعارمالارى وقىرمان تاراپىنان جوعارى باعالاندى. قازاق ءباسپاسوزىنىڭ وركەندەۋىنە ەلەۋلى ەڭبەك ءسىڭىرىپ، ناعىز شىعارماشىل تۇلعا رەتىندە ونەگەلى ءومىر ءسۇردى. سوڭىنا ادەبي باي مۇرا قالدىرعان تەمىرحان مەدەتبەكتىڭ جارقىن بەينەسى مەن ەسىمى ۇمىتىلمايدى، – دەلىنگەن جەدەلحاتتا.
تەمىرحان مەدەتبەك 1945 جىلى 6 ناۋرىزدا وڭتۇستىك قازاقستان وبلىسى تۇركىستان اۋدانىنا قاراستى امانگەلدى اتىنداعى كولحوزدا (قازىرگى نۇرتاس اۋىلى) دۇنيەگە كەلگەن.
ول – «ساپار الدىندا» (1973)، «الىس شاقىرىمدار» (1975)، «كوگەرشىن قاۋىرسىندارى» (1982)، «داۋىس» (1984)، «قالالىق ەسكيزدەر» (1985)، «تاعدىرلى جىلدار جىرلارى» (2000)، «كوك تۇرىكتەر سارىنى» (2001) اتتى جىر جيناقتارىنىڭ اۆتورى.
ادەبيەت تۋرالى تولعامدارى: «اباي الەمى» (1995)، «بابا ءداستۇردىڭ مۇراگەرى كىم: تۋعان ادەبيەت تۋرالى ويلار» (2006)، «سەگىز قىرلى، سەكسەن سىرلى الەم بۇل» (تۋعان ادەبيەت تۋرالى ويلار)، «كۇرەتامىر» (2012).
اۆتورلىق پوەمالارى: «ماحامبەت رۋحىنىڭ مونولوگى»، «كۇلتەگىن»، «تونىكوك».
قازاق اقىنىنىڭ ولەڭدەرى قىرعىز، وزبەك، ۋكراين، ورىس، جۇڭگو جانە تاتار تىلدەرىنە اۋدارىلعان.
