مەملەكەت باسشىسى قازاقستان حالقىنا جولداۋىندا ايماقتارداعى الەۋمەتتىك تۇرعىدان وسال توپتاعى ازاماتتارعا بولىنەتىن الەۋمەتتىك تولەمدەردى بىرىزدەندىرۋ كەرەكتىگىن مالىمدەدى.
قاسىم-جومارت توقايەۆتىڭ ايتۋىنشا، مەملەكەتتىڭ كوز الدىنداعىدان باسقانى كورمەي، بارىنە كونە بەرەتىن الەۋمەتتىك ساياساتى جۇزدەن استام ءتۇرلى جەڭىلدىكتىڭ پايدا بولۋىنا اكەپ سوقتىردى.
"وسى جەڭىلدىكتەردى اپەرەمىن دەپ "كومەك قولىن" سوزاتىن جىلپوستار دا كوبەيدى.
ءبىز ءالى كۇنگە دەيىن بۇرىنعى كسرو اۋماعىنداعى جانە ودان تىس باسقا دا ايماقتارداعى قاقتىعىستارعا قاتىسقان ازاماتتارعا ارنايى تولەمدەر جاساپ، مەديسينالىق قىزمەت كورسەتىپ كەلەمىز. كسرو-نىڭ ىدىراعانىنا 35 جىل بولسا دا، ارداگەرلەرىمىز بارعان سايىن "جاسارىپ"، كوبەيىپ بارادى.
مەملەكەت ءوزىنىڭ نەگىزگى مىندەتتەرىن ورىنداۋدان باس تارتپايدى. ءبىراق الەۋمەتتىك جەڭىلدىكتەردى قولدان كوبەيتۋ – ەلدى دامىتۋعا، ياعني مەكتەپ، اۋرۋحانا، كولىك ينفراقۇرىلىمدارىن جانە باسقا دا نىساندار سالۋعا جۇمسالۋى قاجەت قىرۋار قاراجاتتى جەلگە شاشۋ دەگەن ءسوز.
كەزىندە بىزدەگى "الەۋمەتتىك سالانىڭ جاناشىرلارى" تولىق ەمەس وتباسى دەگەن جەڭىلدىككە مۇقتاج ادامدار ساناتىن ويلاپ تاپقان ەدى.
سونىڭ سالدارىنان، اجىراسقان وتباسىلار سانى كۇرت ءوسىپ، ءبىز ءبىر كەزدە بۇل كورسەتكىش بويىنشا الەمدە "كوش باستاعان" ەلدەردىڭ قاتارىنا قوسىلدىق. مۇنداي مىسالدار از ەمەس. وسىلايشا، ءبىز ءوزىمىز جالقاۋلىق پەن ماسىلدىققا جول بەرىپ وتىرمىز.
وتباسى مۇشەلەرىنىڭ بارلىعى دەرلىك نىسانالى الەۋمەتتىك كومەك پەن جاردەماقى الاتىن بولسا، جۇمىس ىستەۋدىڭ نە قاجەتى بار؟ باسقاشا ايتساق، الەۋمەتتىك سالادا وڭتايلى شەشىم قابىلداۋدىڭ ورنىنا، ۇكىمەت كەمىندە 15 جىل بويى الەۋمەتتىك ماسىلدىق پەن الەۋمەتتىك الاياقتىققا جول بەرىپ كەلدى"، - دەدى پرەزيدەنت.
پرەزيدەنت ەلدەگى دەموگرافيالىق ۇردىستەردى ەگجەي-تەگجەيلى زەردەلەپ، ۇزاق جىلعا ارنالعان شەشىمدەر قابىلداۋ ايرىقشا ماڭىزدى ەكەنىن اتاپ ءوتتى.
"الايدا وسى سالادا مالىمەتتەردى ءتيىستى دەڭگەيدە ەسەپكە الىپ، تالداۋ جاساۋ جولعا قويىلماعان. بۇل جاعداي ەڭبەك نارىعىنىڭ سۇرانىسىن بولجاۋ، ينفراقۇرىلىمدى دامىتۋ جۇمىسىن جوسپارلاۋ جانە باسقا دا مىندەتتەردى ورىنداۋ جولىندا قيىندىق تۋعىزادى.
ستراتەگيالىق جوسپارلاۋ جانە رەفورمالار اگەنتتىگىنىڭ بازاسىندا اۋقىمدى دەرەكتەر مەن جاساندى ينتەللەكت تەحنولوگيالارى ەنگىزىلگەن دەموگرافيالىق ۇدەرىستەردى تالداۋ جانە بولجاۋ ورتالىعىن قۇرۋ كەرەك.
دەموگرافيا جانە ەڭبەك نارىعىنداعى ۇردىستەر زەينەتاقى جۇيەسىنە قاتىستى ۇستانىمداردى قايتا قاراۋدى قاجەت ەتەدى. ازاماتتاردىڭ، اسىرەسە، ءوز-وزىن جۇمىسپەن قامتىپ وتىرعان ادامداردىڭ زەينەتاقى جيناعى از ەكەنى بايقالادى.
ۇكىمەت ۇلتتىق بانكپەن، سونداي-اق ستراتەگيالىق جوسپارلاۋ جانە رەفورمالار اگەنتتىگىمەن بىرلەسە وتىرىپ زەينەتاقى جۇيەسىنىڭ قارجىلىق تۇراقتىلىعىن نىعايتۋ، زەينەتاقى تولەمدەرىنىڭ ۇزاق ۋاقىت بويى تەڭگەرىمدى جانە لايىقتى دەڭگەيدە بولۋىن قامتاماسىز ەتۋ شارالارىن ويلاستىرۋى كەرەك"، - دەدى قاسىم-جومارت توقايەۆ.
مەملەكەت باسشىسى ازاماتتاردىڭ قارجىلىق ساۋاتتىلىعىن ارتتىرۋ ماسەلەسى ءالى دە وزەكتى ەكەنىن جەتكىزدى.
"وسى رەتتە AMANAT پارتياسى ۇسىنعان "قارىزسىز قوعام" جوباسىن جۇزەگە اسىرۋدى جالعاستىرۋ كەرەك. بىلتىردىڭ وزىندە وسى جوبا اياسىندا 845 مىڭ ادام ساۋاتىن جەتىلدىرىپ، زاڭگەرلىك كەڭەس الدى. تۇپكى ماقسات – حالىقتىڭ موينىنداعى قارىزىن ازايتۋ عانا ەمەس، ازاماتتاردىڭ تابىسى تۇراقتى بولۋىن قامتاماسىز ەتۋ"، - دەدى پرەزيدەنت.
