تالدىقورعاننىڭ «جەتىسۋ» كومانداسىنىڭ باس باپكەرى سامات سماقوۆ «قايرات» كلۋبىنىڭ جاس قاقپاشىسى شەرحان قالمىرزا تۋرالى پىكىر ءبىلدىرىپ، جاس ويىنشىلاردى شامادان تىس نازاردان قورعاۋ كەرەكتىگىن ايتتى، دەپ حابارلايدى bairaqmedia.kz 1bol.kz-كە سىلتەمە جاساپ.

«ۇلكەن اعاسى رەتىندە ونىمەن ءجيى سويلەسۋگە تىرىسامىن. شىنىمدى ايتسام، وعان باسپاسوزبەن ارالاسپاۋعا، ءتۇرلى تەلەباعدارلامالارعا قاتىسپاۋعا كەڭەس بەردىم. شەرحان ول ءالى وتە جاس. مىسالى، ەركەبۇلان سەيداحمەت «ۋفاعا» اۋىسقان كەزدە ءبارى ونى «تۇنشىقتىرىپ» جىبەردى: «ەركەبۇلان دارەتحاناعا باردى»، «ەركەبۇلان «coco-cola» ساتىپ الدى»، «ەركەبۇلان مىنانى ىستەدى» دەگەن سياقتى جاڭالىقتار تولىپ كەتتى. سوڭىندا تالانتتان ايىرىلدىق»، - دەدى سماقوۆ.

باپكەردىڭ ايتۋىنشا، تىم كوپ نازار مەن ەرتە كەلگەن اتاق جاس فۋتبولشىلاردىڭ قالىپتاسۋىنا كەرى اسەرىن تيگىزۋى مۇمكىن.

«ءقازىر ەڭ باستىسى — بالالارعا قىسىم جاساماۋ، كەرىسىنشە، قولداۋ كورسەتۋ. ولار ءالى ەشتەڭە ۇتقان جوق، سوندىقتان شامادان تىس ماداقتاۋدىڭ قاجەتى جوق. ءبىر ساتتە بۇكىل ءبىر بۋىندى جوعالتىپ الۋ ءقاۋپى بار»،- دەپ قوستى ول.