بۇگىندە جاستاردىڭ تەرىس ءدىني اعىمدارعا، ەكسترەميستىك جانە لاڭكەستىك ۇيىمداردىڭ ىقپالىنا ءتۇسۋى قوعام ءۇشىن وتە وزەكتى ءارى ءقاۋىپتى ماسەلە بولىپ وتىر. بۇل تۋرالى تۇركىستان وبلىسى ءدىن ىستەرى باسقارماسى "ءدىن ماسەلەلەرىن زەرتتەۋ ورتالىعىنىڭ" تەولوگى ەرسۇلتان ەشتاي ايتتى، - دەپ حابارلايدى bairaqmedia.kz
جاسوسپىرىمدەر مەن جاستار – ەلدىڭ بولاشاعى، مەملەكەتتىڭ تىرەگى. ءبىراق ءدال وسى توپ – ءارتۇرلى مانيپۋلياسياعا، جالعان ۋادەلەر مەن پسيحولوگيالىق اسەرگە ەڭ وسال كەلەدى. تەرىس پيعىلدى ۇيىمدار جاستاردىڭ دىنگە دەگەن قىزىعۋشىلىعىن پايدالانىپ، ءوز يدەولوگياسىن تاڭۋعا تىرىسادى. مۇنداي جاعدايدىڭ الدىن الۋ ءۇشىن:
- جاستارعا ءدىني ساۋاتتىلىقتى دۇرىس جولمەن جەتكىزۋ؛
- اقپاراتتىق قاۋىپسىزدىك مادەنيەتىن قالىپتاستىرۋ؛
- وتباسىلىق، مەكتەپتىك، قوعامدىق تاربيەنى كۇشەيتۋ قاجەت، - دەدى تەولوگ.
جاستارعا باعىتتالعان پاتريوتتىق تاربيە، ۇلتتىق قۇندىلىقتاردى ۇعىندىرۋ، زايىرلى قوعام ۇستانىمدارىن ءتۇسىندىرۋ – لاڭكەستىككە قارسى ەڭ ءتيىمدى قۇرالداردىڭ ءبىرى دەيدى ول. ايتۋىنشا، سوڭعى جىلدارى الەمدىك دەڭگەيدە لاڭكەستىك ۇيىمداردىڭ ءوز قاتارىنا جاستاردى تارتۋ ارەكەتتەرى ۇدەي تۇسكەن.
قازاقستان دا بۇل ۇدەرىستەن تىس قالمادى. الەۋمەتتىك جەلىلەر مەن مەسسەندجەرلەر ارقىلى جاستاردىڭ ساناسىنا دەسترۋكتيۆتى يدەيالاردى ءسىڭىرۋ – قازىرگى زاماننىڭ باستى قاۋىپتەرىنىڭ ءبىرى بولىپ وتىر. ونىڭ باستى نىساناسى كوبىنە – جاستار. سەبەبى، جاس بۋىن ىزدەنگىش، ەموسياعا تەز بەرىلگىش ءارى اقپاراتتىق كەڭىستىكتە بەلسەندى. سوندىقتان جاستاردى تەرىس يدەولوگيادان قورعاۋ – قوعام الدىنداعى ەڭ ۇلكەن مىندەتتەردىڭ ءبىرى. جاستاردىڭ ەكسترەميستىك توپتارعا تارتىلۋىنىڭ بىرنەشە نەگىزگى سەبەپتەرى بار:
- اقپاراتتىڭ شەكتەن تىس كوپتىگى جانە ونىڭ سۇزگىسىز قابىلدانۋى؛
- جاستار اراسىنداعى جۇمىسسىزدىق پەن الەۋمەتتىك ادىلەتسىزدىككە سەنىمسىزدىك؛
- قوعامنان وقشاۋلانۋ نەمەسە ءوزىن كەرەكسىز سەزىنۋ؛
- ءدىني ساۋاتتىڭ تومەندىگى مەن جالعان ءدىن تاراتۋشىلاردىڭ ىقپالى.
بۇگىنگى كۇننىڭ باستى تالابى – جاستاردى جات يدەولوگيادان قورعاۋ ءۇشىن وتباسىنان باستاپ، مەكتەپ، قوعام، مەملەكەت بولىپ بىرىگىپ جۇمىس ىستەۋ. سەبەبى ءبىر عانا جاس اداسسا – ونىڭ ارتىندا بۇكىل قوعامنىڭ قاۋىپسىزدىگىنە نۇقسان كەلۋى مۇمكىن، - دەدى ەرسۇلتان ەشتاي
ماماننىڭ ايتۋىنشا، دەسترۋكتيۆتى ءدىني اعىمدار كوبىنە 14-30 جاس ارالىعىنداعى جاستاردى ءوز قاتارلارىنا تارتۋعا تىرىسادى. سەبەبى، بۇل جاستاعى ادامدار ىزدەنىس ۇستىندە، ءوزىن-وزى تانۋعا، قوعامدا ورنىن تابۋعا تىرىسادى. وسى كەزەڭدە ولار جالعان ءدىني يدەيالارعا وڭاي الدانۋى مۇمكىن.
