قازاقستاننىڭ ۇلتتىق وليمپيادا كوميتەتىنىڭ پرەزيدەنتى گەنناديي گولوۆكين حالىقارالىق بوكس فەدەراسياسى - World Boxing ۇيىمىنىڭ پرەزيدەنتى قىزمەتىنە رەسمي ۇمىتكەرلەر تىزىمىنە ەنگىزىلدى، دەپ حابارلايدى bairaqmedia.kz.

ۇيىمنىڭ جاڭا پرەزيدەنتىن سايلاۋ 23 قاراشا كۇنى ريم قالاسىندا World Boxing كونگرەسى اياسىندا وتەدى. سونداي-اق كونگرەسس بارىسىندا فەدەراسيا اتقارۋشى كوميتەتىنىڭ مۇشەلەرى دە تاڭدالادى. قازىرگى تاڭدا WB قۇرامىنا كىرەتىن 125 ەلدىڭ وكىلدەرى داۋىس بەرۋگە قاتىسادى.

World Boxing - 2023 جىلدىڭ ءساۋىر ايىندا قۇرىلعان حالىقارالىق بوكس فەدەراسياسى. 2024 جىلدىڭ قىركۇيەگىندە گەنناديي گولوۆكين WB ۇيىمىنىڭ جاڭا وليمپيادالىق كوميسسياسىنىڭ ءتوراعاسى بولىپ تاعايىندالعان ەدى. ونىڭ نەگىزگى مىندەتى - بوكستى وليمپيادا باعدارلاماسىندا ساقتاۋ جانە World Boxing ۇيىمىنىڭ حالىقارالىق وليمپيادالىق كوميتەت تاراپىنان رەسمي مويىندالۋىنا ىقپال ەتۋ.

2025 جىلدىڭ اقپان ايىندا حالىقارالىق وليمپيادالىق كوميتەت World Boxing ۇيىمىن ۋاقىتشا مويىندادى. بۇل شەشىم ۇيىمعا الەمدىك دەڭگەيدە بوكستى باسقارۋ قۇقىعىن بەردى. ال ناۋرىز ايىندا حوك بوكستى 2028 جىلى لوس-اندجەلەستە وتەتىن وليمپيادا ويىندارىنىڭ باعدارلاماسىنا رەسمي تۇردە ەنگىزۋ تۋرالى شەشىم قابىلدادى.