الماتى وبلىسى تالعار اۋدانى قىزىل قايرات اۋىلىندا تال تۇستە ەر ادامدى اتىپ، ءسابيدى ۇرلاپ كەتتى. جاعا ۇستاتارلىق وقيعا تۋرالى Sputnik قازاقستان تىلشىسىنە جابىرلەنۋشىنىڭ تۋىستارى ايتتى، دەپ حابارلايدى bairaqmedia.kz.

وسىدان ءۇش كۇن بۇرىن كەلىپ، كۇدىكتىلەر ءۇش بالامەن جالعىز وتىرعان اياعى اۋىر بالزيا ابيلايەۆانى ۇرىپ، قورقىتىپ كەتكەن.

"پوليسيا باسقارماسىنا ولاردى ۇستاپ بەردىك. ءبىراق سول كۇنى تۇنگى ساعات ۇشكە دەيىن جۇردىك، ءبىز كەتە سالىپ ولاردى بوساتىپ جىبەرگەن. باستى كۇدىكتى ءقايىنسىڭىلىمنىڭ ارتىنان جۇرگىرگەن جىگىت. ءقايىنسىڭىلىم ودان قانشا قاشىپ، جولاتپاسا دا مازا بەرمەگەن. قورقىتقان، ۇرعان"، - دەيدى بالزيا ابيلايەۆا.

ءبىر ايدان استام ايەلدى قورقىتقان كۇدىكتى - تالعار اۋدانىنىڭ تۇرعىنى، تەحنيكالىق جوندەۋ ورتالىعى بار 1997 جىلعى تۇرعىن.

"كەشە ەنەم ەكەۋمىز ۇيدە بولعانبىز. بۇل تۇسكى ساعات ەكى شاماسى، كۇيەۋىم دۇكەنگە سۋ الۋعا كەتكەن. سول كۇيى ەش حابارسىز كەتتى. جاڭاعى كۇدىكتى قاسىنا ەكى ادامدى ەرتىپ، قولىندا اۆتومات، قاسىنداعى ەكى ادامنىڭ قولىندا پىشاق ۇيگە كىرىپ كەلدى. ەنەمنىڭ ماڭدايىنا اۆتوماتتى تاقاپ، "102 شاقىرساڭ، اتا سالام" دەدى"، - دەيدى بالزيا.

ال بالزيانىڭ موينىنا پىشاق تاقاپ قورقىتقان. بۇل وقيعا بالالاردىڭ كوزىنشە بولعان.

"ءقايىنسىڭىلىمنىڭ قىزى ۇيىقتاپ جاتقان. سونى كوتەرىپ الىپ كەتتى. ولار شىعا سالىپ مەن ارتىنان شىعىپ كولىكتەرىن ۆيدەوعا ءتۇسىرىپ ۇلگەردىم. كورشى تاتە جۇگىرىپ كەلە جاتىر. "ەرنار اندا قانسىراپ جاتىر" دەپ ايقايلايدى. جۇگىرىپ بارسام جۇرەك تۇسىنان ەكى رەت اتىپ كەتىپتى"، - دەيدى بالزيا.

كوشەنىڭ قاق ورتاسىندا كۇندىزگى ساعات 14:15-تە 30 جاستاعى ەرنار تۇرعانبەكوۆ كىسى قولىنان قايتىس بولدى.

قارىنداسىنىڭ قىر سوڭىنان قالماعان ەر ادام اعاسىن اجال قۇشتىردى.

ونىڭ ارتىندا 3 بالا مەن جۇكتى ايەلى قالدى. بالالاردىڭ ۇلكەنى نەبارى 3 جاستا. كۇدىكتى عاشىق بولعان قىزىنىڭ 3 جاستاعى قىزىن الىپ قاشقاندا جاردان ۇشىپ كەتكەن، جانۇشىرا وقيعا ورنىنان قاشقاندا قولعا تۇسكەن.

ال كولىكتە بولعان نارەستەنىڭ ءتىلىن 8 جەردەن تىكتى، دەنەسىندە ساۋ تامتىق جوق دەيدى تۋىستارى. ءقازىر اناسىمەن بىرگە اۋرۋحانادا جاتىر.

كۇدىكتى عاشىعىن وزىمەن دوس بولۋعا ماجبۇرلەگەن. قىز تۋىستارىنا ايتۋعا قورقىپ، سوڭعى ون كۇندە عانا شىندىقتى ايتقان.

"كۇدىكتى ءقايىنسىڭىلىمنىڭ كلاستاسى بولعان دەپ ەستىدىم، ءبىراق ناقتى بىلمەيمىن. بالانى جاردان ۇشقاندا قۇداي قاققان. كەشە جانساقتاۋ بولىمىنەن شىعارىلدى. ءقايىنسىڭىلىم ەكى جەردە جۇمىس ىستەگەن، قورىققانىنان ءبىر جۇمىستان شىعىپ كەتتى. ول پوليسياعا قانشا رەت ارىزداردى، ءتىپتى زورلادى دەپ ايتتى. ءبىراق ەشكىم ءبىزدىڭ شاعىمعا قۇلاق اسپادى"، - دەيدى بالزيا.

ال وققا ۇشقان جىگىتتىڭ اناسىنىڭ دەنساۋلىعى سىر بەرگەن.

"بالامنىڭ قانى توگىلگەن كوشەمەن قالاي جۇرەم... تۇرعىم كەلمەيدى بۇل اۋىلدا. السىن جازالارىن، اللا سازايىن بەرسىن"، - دەپ اڭىرادى اناسى.

وقيعاعا قاتىستى قىلمىستىق ءىس قوزعالىپ، كۇدىكتىلەر قاماۋعا الىندى.