قازاقستاندا قاتەرلى ىسىككە شالدىعۋ دەڭگەيى ءوسىپ كەلەدى، اسىرەسە ءىرى قالالاردا ، دەپ حابارلايدى bairaqmedia.kz Energyprom.kz-كە سىلتەمە جاساپ.

دەنساۋلىق ساقتاۋ مينيسترلىگىنىڭ دەرەكتەرىنە سايكەس، 2024 جىلى قالا تۇرعىندارى اراسىندا قاتەرلى ىسىككە شالدىعۋ دەڭگەيى ءاربىر 100 مىڭ ادامعا شاققاندا 239،2-گە جەتكەن. بۇل وتكەن جىلعى كورسەتكىشپەن (230) سالىستىرعاندا جوعارى.

ءبىرقاتار وڭىردە اۋرۋشاڭدىق دەڭگەيى ورتاشا رەسپۋبليكالىق كورسەتكىشتەن ەداۋىر اسىپ ءتۇستى. ماسەلەن، شىعىس قازاقستان وبلىسىندا – 349،4، قاراعاندى وبلىسىندا – 353،5، اباي وبلىسىندا – 302،4، ال قوستاناي وبلىسىندا – 352،7.

«اۋىلدىق جەرلەردە جاعداي وزگەشە: 2024 جىلى قاتەرلى ىسىككە شالدىعۋ دەڭگەيى 100 مىڭ تۇرعىنعا شاققاندا 147،1-گە دەيىن تومەندەدى. بۇل كورسەتكىش 2023 جىلى 173،8 بولعان ەدى. دەگەنمەن، شىعىس قازاقستان وبلىسىنىڭ (355،2) جانە اقمولا وبلىسىنىڭ (306،2) اۋىلدارىندا كورسەتكىش ءالى دە جوعارى كۇيىندە قالىپ وتىر»، – دەلىنگەن زەرتتەۋدە.

جالپى العاندا، ەل بويىنشا قاتەرلى ىسىككە شالدىققان ناۋقاستار سانى وتكەن جىلى 230،9 مىڭ ادامدى قۇرادى. بۇل 2023 جىلمەن سالىستىرعاندا 12،8 مىڭعا ارتىق. الماتىدا 34،2 مىڭ ناۋقاس ەسەپتە تۇر، الايدا مامانداردىڭ ايتۋىنشا، بۇل كورسەتكىشتىڭ جوعارى بولۋى قالا حالقىنىڭ كوپتىگىنە بايلانىستى. كەلەسى ورىنداردا – قاراعاندى وبلىسى (21،4 مىڭ ناۋقاس) جانە استانا (16،8 مىڭ ناۋقاس).