اباي وبلىسىنىڭ ءۇرجار اۋدانىنا قاراستى بەستەرەك اۋىلىندا بولعان قايعىلى جول اپاتىنىڭ جاي-جاپسارىن مارقۇمداردىڭ تۋىستارى ايتىپ بەردى. قازا تاپقان بالالاردىڭ ەڭ كىشىسى نەبارى 2 جاستا ەدى. ال اۋىر جاراقات العان تاعى ءۇش ءبۇلدىرشىننىڭ ءومىرى ءۇشىن دارىگەرلەر كۇرەسىپ جاتىر، دەپ حابارلايدى bairaqmedia.kz 31-ارنانىڭ ينفورمبيۋرو جاڭالىقتارىنا سىلتەمە جاساپ.

قايعىلى جاعداي ەكى بىردەي وتباسىنىڭ قابىرعاسىن قايىستىردى. مارقۇمداردىڭ ۇلكەنى – 8، ال كىشىسى – 2 جاستا بولعان. كۋاگەرلەردىڭ سوزىنشە، كولىك جول جيەگىنەن شىعىپ كەتىپ، ءۇيدىڭ قاقپاسىنا سوعىلعان. سول ساتتە اۋلادا ويناپ جۇرگەن التى بالانى باسىپ وتكەن. ءۇيدىڭ الدىندا ءالى دە قيراعان قاقپا مەن قورشاۋ جاتىر.

“قاقپانىڭ جانىندا جۇرگەن ءبىر قىزدى قاقتى. كەيىن قاقپانى بۇزىپ كىرىپ، ىشىندە وتىرعان بالالاردى باسىپ ءوتتى. ەكى بالا قاقپا مەن دوڭگەلەكتىڭ ورتاسىنا قىسىلىپ قالدى. جۇك تيەگىشپەن كولىكتى كوتەرىپ بارىپ، بالالاردى شىعارىپ الدىق”، – دەيدى مارقۇمداردىڭ تۋىسى ەربولات سۇيگەنبايەۆ.

كورشىلەر جەدەل جاردەم جەتكەنشە، زارداپ شەككەندەردى اۋرۋحانا مەن ءمايىتحاناعا جەتكىزۋگە كومەكتەسكەن. وكىنىشكە قاراي، ءبىر ۇل مەن قىز وقيعا ورنىندا جان تاپسىرسا، تاعى ءبىر قىز جولدا كوز جۇمعان.

“ءتورت بالانى الىپ كەتتى، قالعان ەكەۋىن تجم قىزمەتكەرلەرىمەن بىرگە مەنىڭ كولىگىمە سالدى. سودان ءمايىتحاناعا اپاردىم. ءقازىر بۇكىل اۋىلدىڭ قابىرعاسى قايىسىپ وتىر. بارلىق جاقىندارىنا كوڭىل ايتامىن”، – دەيدى اۋىل تۇرعىنى مۇرات احمەتوۆ.

ال 6 مەن 9 جاس ارالىعىنداعى ءۇش بالا اۋىر حالدە اۋرۋحاناعا جەتكىزىلگەن. ولاردىڭ ەكەۋى ساناۆياسيامەن نۇر-سۇلتانعا جەتكىزىلدى. ال اۋداندىق اۋرۋحانادا جاتقان قىزدىڭ جاعدايى وتە اۋىر. دارىگەرلەر وعان بىرنەشە كۇردەلى وتا جاسادى.

“ءاربىر وپەراسيا شامامەن ەكى ساعاتقا سوزىلدى. الدىمەن ىشكى اعزالارداعى قان كەتۋدى توقتاتتىق، كەيىن باس ميىنا جاسالعان جاراقاتقا وتا جاسالدى. ومىرىنە تىكەلەي ءقاۋىپ ءتونىپ تۇر دەۋگە بولادى، سەبەبى جاراقاتتارى وتە اۋىر”، – دەيدى نەيروحيرۋرگ ساپاربەك سەيىتبەكوۆ.

بالالاردى قاققان 55 جاستاعى جۇرگىزۋشى قاماۋعا الىندى. ول دا وسى اۋىلدىڭ تۇرعىنى ەكەن. ۇلدارىنىڭ ايتۋىنشا، اكەسى تاجىريبەلى، ۇزاق جىلدار اۆتوبۋس جۇرگىزگەن. جول اپاتى بولعان ساتتە كولىكتە ونىڭ جارى دا وتىرعان.

“اكەمنىڭ جۇرەك تالماسى ۇستاپ، رولگە يە بولا الماي قالعان. بۇل – وقىس جاعداي. ءبىز مارقۇمداردىڭ وتباسىلارىنا كوڭىل ايتتىق، كەشىرىم سۇرادىق. وتە اۋىر سىناق، مۇندايدى ەشكىمنىڭ باسىنا بەرمەسىن”، – دەيدى جۇرگىزۋشىنىڭ ۇلى ەرقانات سەرىك ۇلى.

ساراپتاما جۇرگىزۋشىنىڭ ماس بولماعانىن انىقتادى. ءقازىر پوليسيا قىلمىستىق ءىس قوزعاپ، اپاتتىڭ ءمان-جايىن تەكسەرىپ جاتىر.