قاسىم-جومارت توقايەۆ اۋىل شارۋاشىلىعى جەرلەرىن بەرۋ ءتارتىبىن وزگەرتۋدى تاپسىردى، دەپ حابارلايدى bairaqmedia.kz.
وسى ۋاقىتقا دەيىن مەملەكەت مەنشىگىنە قايتارىلعان اۋىل شارۋاشىلىعى جەرلەرى از ەمەس. ءبىراق ءۇش جىلدىڭ ىشىندە 13،5 ملن گەكتاردان استام جەر قايتارىلسا دا، جارتىسى عانا جاڭا جەر يەلەنۋشىلەرگە تاراتىلدى.
"سوندىقتان اكىمدىكتەر قايتارىلعان جەردىڭ ءبارىن كەلەسى جىلدىڭ ورتاسىنا دەيىن تۇراقتى اينالىمعا ەنگىزۋى كەرەك. بۇل شارا ارقىلى جايىلىم تاپشىلىعى ماسەلەسى دە شەشىلۋگە ءتيىس. جالپى، جەر قاتىناستارىنا قاتىستى زاڭسىزدىق پەن قاعازباستىلىقتى جويۋ قاجەت. سول ءۇشىن اۋىل شارۋاشىلىعى جەرلەرىن بەرۋ تاسىلدەرىن تۇبەگەيلى وزگەرتۋ كەرەك"، - دەدى توقايەۆ حالىققا ارناعان جولداۋىندا.
پرەزيدەنتتىڭ ايتۋىنشا، جەردى بولۋگە قاتىستى شەشىم سيفرلىق فورماتتا جانە ەلەكتروندى كونكۋرستاردىڭ نەگىزىندە قابىلدانۋى شارت.
"ۇكىمەت جىلدىڭ سوڭىنا دەيىن زاڭناماعا ءتيىستى وزگەرىستەردى ۇسىنۋى قاجەت"، - دەدى توقايەۆ.
وسى ورايدا پرەزيدەنت جاساندى ينتەللەكتىنى قولدانىپ، اۋىل شارۋاشىلىعى جەرلەرىنە سپۋتنيكپەن مونيتورينگ جاساۋدىڭ تيىمدىلىگىن ارتتىرۋ كەرەكتىگىن دە ەرەكشە ايتتى.
"سونىڭ نەگىزىندە جەردىڭ ساپاسىنا، ەگىننىڭ شىعىمىنا، ءداندى-داقىلداردىڭ جاي-كۇيىنە جانە قاي جەرگە قانداي داقىل ەگىلگەنىنە تەرەڭ تالداۋ جاسالۋعا ءتيىس. بۇل – ورمان شارۋاشىلىعىنا دا قاتىستى ماسەلە. سولتۇستىك قازاقستان وبلىسىندا 9 مىڭ گەكتار ورماننىڭ يەسىز جاتقانى انىقتالدى"، - دەدى مەملەكەت باسشىسى.
بۇدان بولەك، جەر رەسۋرستارىنىڭ ءبىرىڭعاي سيفرلىق كارتاسى ازىرلەنەدى. وعان كاداسترلىق مالىمەتتەردى، ينفراقۇرىلىمعا جانە جەر قويناۋىن پايدالانۋعا قاتىستى اقپاراتتى كىرىكتىرۋ قاجەت.
