اقش پرەزيدەنتى دونالد ترامپ مىسىردا وتكەن سامميتتە باسقا ەل باسشىلارىمەن بىرگە گازا سەكتورى بويىنشا بەيبىت كەلىسىمگە قول قويدى. ونىڭ سوزىنشە، بۇل ەڭ قيىن كەلىسسوزدەر بولدى.
CBC اقپاراتىنا سايكەس، دونالد ترامپ گازاداعى سوعىستى توقتاتۋعا باعىتتالعان كەلىسىمگە قول قويعان. اسا ماڭىزدى قۇجاتقا قول قويۋ ءراسىمى شارم-ەش-شەيحتەگى سامميت كەزىندە وتكەن.
سونداي-اق اراعايىندىق جاساعان مىسىر، كاتار جانە تۇركيا وكىلدەرى دە بەيبىت كەلىسىمگە قول قويدى.
CNN حابارلاۋىنشا، دونالد ترامپ ءسامميتتى باسقارىپ وتىرعانىنا اسا ريزا ەكەنىن ءبىلدىرىپ، بۇل اۋىر كەلىسسوزدەردىڭ جۇزەگە اسۋىنا ۇلەس قوسقان قىزمەتكەرلەرى مەن كومەكشىلەرىن العىسىن ايتتى.
"اسا قيىن بولادى دەپ ويلادىم، مۇمكىن كوبىنە سولاي دا بولدى، ءبىراق بىزدە تالانتتى ادامدار كوپ قوي. ءبىز كەرەمەت تالانتتاردى ىرىكتەپ الدىق جانە ونىڭ كوپ كومەگى بولدى، اسىرەسە وسى ۇستەل باسىنداعى ەلدەردىڭ دە"، - دەدى ترامپ.
ربك اقپاراتىنشا، قول قويۋ ءراسىمى كەزىندە ترامپ ءۇشىنشى دۇنيەجۇزىلىك سوعىستىڭ بولاتىنىن جوققا شىعاردى.
"تاياۋ شىعىستا ءۇشىنشى دۇنيەجۇزىلىك سوعىس بولادى دەپ ءجيى ايتادى. الايدا سوعىس بولمايدى. ءبىز ونىڭ بولعانىن مۇلدەم قالامايمىز"، - دەدى اقش پرەزيدەنتى.
