اقتاۋ قالاسىندا تۇراتىن بەيسەنبەك رىسجانوۆ پەن لياززات ابداشوۆا جەتىم قالعان بەس بالانى بىر-بىرىنەن اجىراتپاي اسىراپ الدى. بالالاردىڭ ۇلكەنى – 15 جاستا، كەنجەسى – 4 جاستا، دەپ حابارلايدى bairaqmedia.kz.

ماڭعىستاۋ وبلىسى قوعامدىق كوممۋنيكاسيا ورتالىعىنىڭ مالىمەتىنە سايكەس، بالالاردىڭ ومىرگە دەگەن قۇلشىنىسى ارتقان.

لياززات ابداشوۆانىڭ ايتۋىنشا، ولار شاڭىراق قۇرعاننان كەيىن 3 جىلدان سوڭ تۇڭعىشتارىن دۇنيەگە اكەلگەن. سودان كەيىن سەگىز جىل بويى وزدەرىنىڭ بالا سۇيگىسى كەلگەن. وسى كەزەڭدە ەرلى-زايىپتى بالا اسىراپ الۋ پورتالىنا تىركەلىپ، ۇسىنىس تۇسكەندە بەس باۋىردى بىرگە اسىراپ الۋعا شەشىم قابىلداعان.

بالالاردىڭ ۇلكەنى باستاپقىدا باسقا وتباسىعا بەرىلمەك بولعان. لياززات ابداشوۆا بۇل تۋرالى ەستىگەننەن كەيىن بارلىق بالالاردى بىرگە الۋعا ءوتىنىش بىلدىرگەن.

«بەسەۋى دە وتباسىمىزعا تەز ۇيرەنىپ، بىر-بىرىمەن تاتۋ بولدى. بالالاردىڭ جاستارى قاتار، سوندىقتان ولار بىرگە ويناپ، ۋاقىتتارىن جاقسى وتكىزەدى. بارلىعى ءبىزدى ماما دەپ اتاپ كەتتى. ءقازىر ولاردىڭ جاعدايى جاقسى، ءبىز وتە باقىتتىمىز»، – دەدى ول.

وتباسى بالالاردىڭ جاعدايىن جاقسارتۋ ءۇشىن باسپاناسىن كەڭەيتۋدى جوسپارلاپ وتىر. لياززات ابداشوۆانىڭ ايتۋىنشا، قازىرگى كەزدە ولار بەس بولمەلى پاتەردە تۇرادى. جوعارعى قاباتتان ءتورت بولمەلى پاتەر ساتىپ العان، ونى جوندەۋدەن وتكىزىپ، ەكى پاتەردى بىرىكتىرىپ، ءار بالاعا جەكە بولمە جاساۋ جوسپارلانعان.