حالقىمىزدىڭ ەجەلگى ءارى كيەلى سۋسىنى – قىمىزعا ارنالعان بۇرىن-سوڭدى بولماعان كولەمدەگى BaiQymyz فەستيۆالى ەكى كۇن بولادى، – دەپ حابارلايدى اikyn.kz.

گاستروفەستيۆالگە ەلىمىزدىڭ بارلىق وڭىرىنەن 50-دەن استام قىمىز ءوندىرۋشى قاتىسۋدا. جالپى كولەمى 16 تونناعا جۋىق قىمىز ۇسىنىلۋدا. وعان قاتىسۋ تەگىن.

فەستيۆالگە 50-60 مىڭ ادام كەلەدى دەپ جوسپارلانعان. قوناقتار ەكى كۇن بويى ءارتۇرلى وڭىرلىك قىمىزدان ءدام تاتىپ، شيپالى سۋسىننىڭ قاسيەتىمەن تانىسادى. قىمىزدىڭ ەمدىك قۋاتى مەن ءداستۇرلى دايىندالۋ ادىستەرى شەبەرلىك ساباقتارى مەن عىلىمي كونفەرەنسيالاردا كەڭىنەن تالقىلانادى.

«ەڭ ۇزدىك قىمىز» اتاعى ءۇشىن بايقاۋ فەستيۆالدىڭ باستى وقيعاسى بولماق. ساپاسى مەن ءدامى ۇيلەسكەن، ءداستۇرلى ادىسپەن دايىندالعان ەڭ شيپالى قىمىز يەلەرى قوماقتى جۇلدە قورىنا يە بولادى. جۇلدە قورى – 45 ميلليون تەڭگە:  I ورىن – 20 ملن تەڭگە؛ II ورىن – 15 ملن تەڭگە؛ III ورىن – 10 ملن تەڭگە.

قىمىزبەن قاتار، شارا اياسىندا جىلقى كورمەسى، قازاقي تۇقىمداردى تانىستىرۋ، ات ابزەلدەرى جارمەڭكەسى، ۇلتتىق سپورت تۇرلەرىنەن جارىستار، قولونەر شەبەرلەرىنىڭ شەبەرلىك ساباقتارى، عىلىمي كونفەرەنسيا جانە اۋكسيوندار دا ءوتىپ جاتىر.

فەستيۆال قوناقتارى گەرمانيا، رەسەي، قىرعىزستان ەلدەرىنەن كەلگەن عالىمدار، دارىگەرلەر مەن ۆەتەرينارلاردىڭ باياندامالارىن تىڭداپ، قىمىز كاپسۋلالاۋ، اشىتۋ تەحنولوگياسى، ساقتاۋ ادىستەرى سياقتى زاماناۋي تاسىلدەرمەن تانىسادى.