الماتىداعى پسيحيكالىق ساۋىقتىرۋ ورتالىعىندا تاۋەلدى ادامدار تەگىن ەمدەلەدى، دەپ حابارلايدى bairaqmedia.kz
ەكى ميلليوننان استام حالىق مەكەندەيتىن الماتىداعى دۇكەن سورەلەرىندە الكوگولدىڭ ءتۇر-تۇرى بار. سوڭعى كەزدەرى الماتى قالالىق پسيحيكالىق ساۋىقتىرۋ ورتالىعىندا ەمدەلۋشىلەر اراسىندا باعاسى ۋداي ىشىمدىككە تاۋەلدىلەر دە شيپا ىزدەپ كەلەدى. ولار سوت شەشىمىمەن ءماجبۇرلى تۇردە ۇزاق ۋاقىت ەمدەلەدى.
قىمبات اراق بولسىن، ارزانىن ىشسە دە ونىڭ اعزاسى سوعان تاۋەلدى بولىپ تۇر. قالاي دەسەك تە، ماسكۇنەمدىك دەرتىنە دۋشار بولادى. سالدارى بىرەۋ. ەندى كەيبىرەۋلەر «مەن تازاسىن ءىشىپ جاتىرمىن، تاۋەلدى بولمايمىن» دەگەن سەنىمدە. وكىنىشكە قاراي، سوقىر سەنىممەن ءوزىنىڭ سوزىلمالى اۋرۋعا بوي الدىرعانىن تۇسىنبەيدى، - دەيدى الماتى قالالىق پسيحيكالىق ساۋىقتىرۋ ورتالىعىنىڭ ديرەكتورى ساپار راحمەنشەيەۆ.
بيىل قالا بويىنشا 4700-گە جۋىق ادام ناركولوگيالىق ديناميكالىق باقىلاۋدا تۇر. ولاردىڭ 1300ء-ى ەسىرتكىگە تاۋەلدى. ورتالىق ديرەكتورى ساپار راحمەنشەيەۆتىڭ ايتۋىنشا، اششى سۋعا تاۋەلدى ەكەنىن ادامنىڭ بويىندا پايدا بولاتىن بەلگىلەردەن بايقاۋعا بولادى. كوپ جاعدايدا تۋىستارى ناۋقاستىڭ ماسكۇنەم ەكەنىن مويىنداۋدان باس تارتادى. ماماندار سول اۋرۋ بەلگىلەرىن ءتۇرلى سىلتاۋمەن اقتاپ الىپ، دەرتتىڭ اسقىنىپ كەتكەنىن بايقامايدى دەگەن پىكىردە.
الكوگوليزمنىڭ ءۇش كەزەڭى بار. ءبىرىنشى كەزەڭىندە ادامدار الكوگولدى اندا-ساندا ىشەدى، ءبىراق كولەم جاعىنان كوپ ىشەدى. كەيبىرەۋلەر 100-200 گرام ءىشىپ توقتايتىن بولسا، بۇلار «قۇلقىنىم اشىلىپ كەتتى» دەپ 1 ليترگە دەيىن ىشەدى. ەكىنشى كەزەڭدە ابستينەنتتىك سيندروم، قان قىسىمى كوتەرىلەدى، جۇرەك قاعىسى جيىلەيدى. سودان ارىلۋ ءۇشىن جالپاق تىلمەن ايتقاندا «باس جازادى». ودان كەيىن اپتالاپ، ايلاپ ءىشۋ ادەتكە اينالادى. اششى سۋدى ۇزاق ۋاقىت تۇتىنۋ سالدارىنان پسيحوز پايدا بولادى. كوزىنە ەلەس كورىنەدى. بۇلاردىڭ ەرەكشەلىگى اۋزىنا الكوگول سۋسىنى تيسە، اۋرۋى قوزادى. مۇنى ءۇشىنشى كەزەڭ، - دەيدى ورتالىق باسشىسى.
ساپار راحمەنشەيەۆ ىشىمدىككە ءۇيىر ادامنىڭ ورتالىق نەرۆ جۇيەسى، ويلاۋ قابىلەتى ، جۇرەك قىزمەتى، قان اينالىمى، اس قورىتۋ مۇشەلەرى بۇلىنەتىنىن ايتادى. اراق، سىرا، شاراپتى تۇراقتى تۇردە تۇتىنعان ادامنىڭ فيزيكالىق جاعدايى، پسيحولوگياسىمەن بىرگە تۋىستارىنىڭ دا مازاسىن قاشىرىپ، ءومىرىن توزاققا اينالدىرادى . ءارى ۇزاق ۋاقىت ەمدەلگەن ادام عانا اۋرۋدى ەڭسەرەدى.
الماتى قالالىق پسيحيكالىق ساۋىقتىرۋ ورتالىعىندا ءماجبۇرلى تۇردە ەمدەيتىن ءبولىم بار. وندا ەمدەلىپ جاتقانداردىڭ ءبىرى 46 جاستاعى الماتىلىق دينا. ول 5 جىلدان بەرى اششى سۋدىڭ قۇرساۋىندا.وتباسى، قىزى بار.
بارلىق ادامدار سەكىلدى كۇندەلىكتى تىرشىلىگىمدى جاساپ جۇرەمىن. مەيىربيكەمىن. دۇكەنگە قالاي بارىپ، قالاي ساتىپ الىپ، قالاي ءىشىپ قويعانىمدى بىلمەيمىن. سودان 4،5 كۇن ۇيدە جالعىز وتىرىپ، توقتاماي ىشەمىن. سوسىن التىنشى كۇنى ىشە المايمىن. بۇكىل اعزام ىشىمدىكتى قابىلدامايدى. كۇيەۋىم وسى ورتالىققا اكەلەدى، - دەيدى دينا.
ول ءوزىنىڭ ارەكەتىنە ۇيالامىن دەپ اقتالادى. ءبىراق اراققا قۇمارلىقتى جەڭۋگە قاۋقارسىز ەكەنىن مويىندايدى.
تاڭەرتەڭ كۇيەۋىم دە، قىزىم دا ماعان رەنجىپ، ۇيدە ۇرىس باستالادى. اۋىرىپ، دەنەم قالشىلداپ، سىركەم سۋ كوتەرمەي تۇرسا دا جۇمىسقا كەتەمىن. ءبىراق ۇيدەن شىعىپ، دۇكەنگە بارامىن. كىشكەنە ۇرتتاعاندا دەنەمنىڭ قالتىراپ، دىرىلدەگەنىنەن قۇتىلامىن دەپ ويلايمىن. ءبىر ۇرتتاعاندا ۇيدەگى ۇرىس-جانجال ەسىمە ءتۇسىپ، ىزالانىپ، تاعى ءىشۋدى جالعاستىرامىن، - دەيدى ناۋقاس.
ماماندار ماسكۇنەمدىكتىڭ ەمى بار دەيدى. ورتالىقتا الماتى قالاسىنىڭ تۇرعىندارى تەگىن ەمدەلەدى.
مەن 1997 جىلدان بەرى قانشاما ادامدى ەمدەدىم. ولاردىڭ اراسىندا الكوگول ونىمدەرىنەن باس تارتقان تۇرعىندار وتە كوپ. ەڭ الدىمەن ول ولاردىڭ ەمدەلەمىن دەگەن نيەتى بولۋ كەرەك. ورتالىقتىڭ ناركولوگيالىق قىزمەتى بار. سوندا ەمحانا بولىمىندە ءار اۋداننىڭ ناركولوگ دارىگەرىنە كەلۋ كەرەك. تاعى ءبىر جولى تۋىستارىنىڭ ناۋقاستى ورتالىققا اكەلىپ، ءبىزدىڭ ماماندار تەكسەرىپ، كورسەتكىشتەرى بولسا وسىندا جاتقىزادى. امبۋلاتوريالىق ەم دە تاعايىنداۋى مۇمكىن، - دەيدى باس دارىگەر.
تاعى ءبىر كەڭەس - ورتالىقتىڭ سەنىم تەلەفوندارى بار. پسيحولوگتار تاۋلىك بويى كەز-كەلگەن سۇراققا جاۋاپ بەرەدى. سونىمەن بىرگە ورتالىققا جەدەل جاردەم كولىگى اكەلگەن ناۋقاستار دا تەگىن ەمدەلەدى.
ماماندار ىشىمدىككە اۋەس ناۋقاستى شىڭىراۋدان الىپ شىعۋ ءۇشىن مەديسينالىق ەم، پسيحولوگيالىق كومەكپەن بىرگە تۋىسقاندارىنىڭ قولداۋى اۋاداي قاجەت ەكەنىن ەسكەرتەدى.
