الماتىعا قالا كۇنىنە وراي اتاقتى الەمدىك بويزبەند Backstreet Boys توبى جانكۇيەرلەرىمەن جۇزدەسىپ، اۋەزدى ءان سىيلاپ، الماتىلىقتاردى مەرەكەمەن قۇتتىقتايدى. بۇل جايىندا الماتى قالاسى مادەنيەت باسقارماسىنىڭ وكىلدەرى مەن ەلىمىزدەگى ايتۋلى ءىس-شارا ۇيىمداستىرۋشىلارى باسپا ءسوز ءماسليحاتىندا مالىمدەدى، – دەپ حابارلايدى bairaqmedia.kz.

الەمگە ايگىلى دجەننيفەر لوپەستىڭ عاجايىپ كەشىنىڭ ءىزىن الا، الماتىدا تاعى ءبىر تاريحي ءسات ورىن الادى.  قالا كۇنىنە وراي 

«قالا كۇنى مەرەكەسىندە الماتىلىقتار مەن قوناقتارعا ارناپ مازمۇندى مادەني باعدارلاما ازىرلەپ جاتىرمىز. تۇرعىندار مەن تۋريستەر ءتۇرلى قىزىقتى جوبالارعا، فەستيۆالدەر، جارمەڭكەلەر مەن مەرەكەلىك ءىس-شارالارعا كۋا بولادى. ال Backstreet Boys كونسەرتىنە كەلسەك، ول 19 قىركۇيەك كۇنى ورتالىق ستاديوندا وتەدى. بۇل ولاردىڭ الەمدىك گاسترولىنىڭ جالعاسى ەمەس، ارنايى قازاق جەرىندەگى تىڭدارماندارىنا ارنالعان جەكە كەش بولماق. جالپى اتاشتى توپ تمد ەلدەرىندە كونسەرت بەرۋدى جوسپارلامايدى، سوندىقتان بۇل ناعىز ەكسكليۋزيۆ كەش»، – دەدى الماتى قالاسى مادەنيەت باسقارماسى باسشىسىنىڭ ورىنباسارى ارمان حالبەكوۆ.

كەش بارىسىندا توپتىڭ I Want It That Way، Everybody (Backstreet’s Back)، As Long As You Love Me، Show Me The Meaning of Being Lonely، Shape of My Heart سىندى اتاقتى حيتتەرى جانە سوڭعى شىققان تۋىندىلارى شىرقالماق. كونسەرتكە بيلەتتەر باعاسى 40 مىڭ تەڭگەدەن باستالاتىن بولادى. بيلەتتەردى 14 شىلدە ساعات 11:00-دەن باستاپ ساتىپ الۋ مۇمكىندىگى بار. 

ۇيىمداستىرۋشىلار شوۋ ساپاسىنىڭ جوعارى بولۋىنا ءارى قالا تۇرعىندارى مەن قوناقتارى ءۇشىن قولجەتىمدى بولۋىنا باسا ءمان بەرگەن. بيلەت باعاسى كوپشىلىكتىڭ وسى تاريحي كەشكە كۋا بولۋىنا مۇمكىندىك بەرەدى. 

ايتا كەتەيىك، بۇعان دەيىن الماتىدا 50 Cent، Akon، Lara Fabian، Nicole Scherzinger، Ne-Yo، Tarkan، Arash، Blue، C.C. Catch، Jason Derulo، Scorpions سىندى الەمدىك جۇلدىزدار ونەر كورسەتكەن بولاتىن. 

2025 جىلدىڭ سوڭىنا دەيىن قالادا دجەننيفەر لوپەس پەن Backstreet Boys-پەن قاتار، Thirty Seconds to Mars، The Rasmus، Sabaton سەكىلدى ايگىلى توپتاردىڭ كەشتەرى دە وتەدى دەپ جوسپارلانىپ وتىر.