الماتىدا جاڭا كۇرەس زالى اشىلدى، - دەپ حابارلايدى bairaqmedia.kz

بولاشاق چەمپيونداردى تاربيەلەيتىن سپورتتىق نىساندى قازاق سپورت جانە تۋريزم اكادەمياسى ءوز قاراجاتىنا سالعان. ەندى ءبىلىم ورداسىنىڭ ستۋدەنتتەرى قازاق كۇرەسى، ەركىن كۇرەس، گرەك-ريم، دزيۋدو جانە  سامبو تۇرلەرىمەن الاڭسىز اينالىسا الادى. زاماناۋي كەشەن ءبىر اۋىسىمدا 700-گە جۋىق سپورتشىنى قابىلداۋعا دايىن.

سۋ جاڭا كۇرەس زالىنىڭ اشىلۋ سالتاناتىنا ق ر عىلىم جانە جوعارى ءبىلىم مينيسترلىگى، جوعارى جانە جوعارى وقۋ ورنىنان كەيىنگى ءبىلىم كوميتەتى ءتوراعاسىنىڭ ورىنباسارى اقەركە ابىلايحان، وليمپيادا چەمپيونى يۋريي مەلنيچەنكو  جانە قازاق سپورت جانە تۋريزم اكادەمياسىنىڭ پرەزيدەنتى قايرات زاكيريانوۆ قاتىستى. سونداي-اق جاڭا كۇرەس زالىندا گرەك-ريم كۇرەسىنەن پاريج وليمپياداسىنىڭ جۇلدەگەرى دەمەۋ جادىرايەۆ پەن پاراوليمپيادا ويىندارىنىڭ جۇلدەگەرى زارينا رايفوۆا شەبەرلىك ساباقتارىن وتكىزىپ، جاس بالۋاندارعا تاجىريبەلەرىمەن ءبولىستى.

مىڭ شارشى مەتر اۋماقتى الىپ جاتقان بۇل كەشەنگە ءتورت بوزكىلەم قاتار سىييادى. بۇرىن اكادەميا ستۋدەنتتەرى شاعىن زالدا جاتتىعۋ جاساپ، ءىرى جارىستارعا سول جەردە دايىندالاتىن. ءبىراق سول جەردىڭ وزىنەن تالاي الەم چەمپيوندارى شىقتى. ەندى جاڭا، كەڭ ءارى زاماناۋي كۇرەس بازاسىنىڭ اشىلۋى بالۋانداردىڭ دايىندىق دەڭگەيىن جاڭا بەلەسكە كوتەردى-دەپ كۇتىلۋدە.  

قازاق سپورت جانە تۋريزم اكادەمياسى بالۋانداردىڭ ۇستاحاناسى دەۋگە بولادى. وسى جەردە ءبىلىم العان ستۋدەنتتەر وليمپيادا مەن الەمدىك دەڭگەيدەگى دودالاردا تالاي مارتە توپ جاردى. ماسەلەن، اناتوليي كولەسوۆ، ۆالەريي رەزانسيەۆ، جاقسىلىق ۇشكەمپىروۆ، اناتوليي بىكوۆ، ءشامىل سەرىكوۆ جانە يۋريي مەلنيچەنكو – وسى كۇرەس سپورتىنىڭ اڭىزعا اينالعان تۇلعالارى. ولار اكادەميادا ءتالىم الىپ، ءوز ءداۋىرىنىڭ ەڭ مىقتى بالۋاندارىنا اينالدى.

بۇگىنگى كۇنى ولاردىڭ جولىن  جالعاپ، ەل نامىسىن بيىك ۇستاعان داۋلەت تۇرلىحانوۆ، يسلام بايرامۋكوۆ، اسحات جىتكەيەۆ، نۇرباقىت تەڭىزبايەۆ، عۇسمان قىرعىزبايەۆ، دەمەۋ جادىرايەۆ، پاراوليمپيادا جۇلدەگەرى زارينا رايفوۆا، سونداي-اق الەم چەمپيوندارى باقتيار بايسەيىتوۆ، المات كەبىسپايەۆ، قانات بايشولاقوۆ، اسحات شاحاروۆ، اسىلبەك الكەي سىندى سپورتشىلار – كۇللى قازاقتىڭ ماقتانىشى.