2026 جىلى الماتىدا بوكستان ستۋدەنتتەر اراسىندا الەم چەمپيوناتى ءوتۋى مۇمكىن. الەم چەمپيوناتىن قازاقستاندا وتكىزۋدى حالىقارالىق ۋنيۆەرسيتەتتەر سپورتى فەدەراسياسىنىڭ ءوزى ۇسىنىپ وتىر. بۇل تۋرالى الماتىدا وتكەن باسپا ءسوز وتىرىسىندا قازاقستان ۇلتتىق ستۋدەنتتەر سپورت وداعىنىڭ پرەزيدەنتى قايرات زاكيريانوۆ ايتتى، دەپ حابارلايدى bairaqmedia.kz
28-قاراشا كۇنى قىتايدىڭ ماكاو قالاسىندا ازيا ۋنيۆەرسيتەتتىك سپورت فەدەراسياسىنىڭ باس اسسامبلەياسى ءوتتى. بۇل جيىنعا قازاقستان ۇلتتىق ستۋدەنتتەر سپورت وداعىنىڭ پرەزيدەنتى قايرات زاكيريانوۆ ارنايى قاتىسقان. ءىس-شارا اياسىندا وڭىردەگى ۋنيۆەرسيتەتتىك سپورتتى دامىتۋعا قاتىستى نەگىزگى ماسەلەلەر، ىنتىماقتاستىق ستراتەگيالارى جانە ورتالىق ازياداعى ستۋدەنتتىك سپورت جوبالارىن ىلگەرىلەتۋگە باعىتتالعان جاڭا باستامالار تالقىلانىپتى.
بوكستان ستۋدەنتتەر اراسىندا الەم چەمپيوناتىن وتكىزۋ تۋرالى ۇسىنىس – حالىقارالىق ۋنيۆەرسيتەتتەر سپورتى فەدەراسياسى مەن باسقا دا الەمدىك ۇيىمداردىڭ ەلىمىزگە دەگەن زور سەنىمى دەپ بىلەمىز. حالىقارالىق ۋنيۆەرسيتەتتەر سپورتى فەدەراسياسىنىڭ پرەزيدەنتى لەونس ەدەر قازاقستاننىڭ حالىقارالىق ءىرى جارىستاردى ۇيىمداستىرۋدا تاجىريبەسى مول ەكەنىن اتاپ ءوتتى، - دەدى قازاقستان ۇلتتىق ستۋدەنتتەر سپورت وداعىنىڭ پرەزيدەنتى قايرات زاكيريانوۆ.
بوكستان ستۋدەنتتەر اراسىنداعى الەم چەمپيوناتىن وتانداسىمىز گەنناديي گولوۆكين باسقاراتىن WORLD Boxing حالىقارالىق ۇيىمنىڭ قولداۋىمەن وتكىزۋى مۇمكىندىگى جان-جاقتى قاراستىرىلىپ جاتىر. بۇل - جارىستىڭ الەمدىك ارەناداعى بەدەلىن ارتتىرىپ، ەڭ مىقتى سپورتشىلاردىڭ قىزىعۋشىلىعىن وياتادى.
بۇل شارا ءبىزدىڭ بوكسشىلاردىڭ كەلەسى وليمپيادا ويىندارىندا كەمى ءبىر التىن الۋىنا سەپتىگىن تيگىزەدى. بىلەسىزدەر، پاريجدەن بوكسشىلارىمىز التىنسىز ورالدى. بۇعان دەيىنگى وليمپيادالاردا ءبىزدى بوكس قۇتقارىپ كەلگەن ەدى. ءقازىر ءبىز گەنناديي گولوۆكيننىڭ كومانداسىمەن كەلىسسوز جۇرگىزىپ جاتىرمىز، - دەدى قايرات زاكيريانوۆ.
قالادا بوكستان ستۋدەنتتەر اراسىنداعى الەم چەمپيوناتىن وتكىزۋ ءۇشىن قوسىمشا سپورتتىق نىساندار سالۋدىڭ قاجەت جوق ەكەن.
بۇعان قوسا، ەلىمىزدە ستۋدەنتتەر اراسىندا Combat بويىنشا الەم چەمپيوناتىن وتكىزۋگە قاتىستى جۇمىستار جۇرگىزىلىپ جاتىر. اۋقىمدى سپورتتىق شارا 2028 جىلى استانا قالاسىندا ۇيىمداستىرىلماق.
2028 جىلى وسى چەمپيوناتتى وتكىزگىمىز كەلىپ وتىر. ءارى ونىڭ باعدارلاماسىنا قازاق كۇرەسىن قوسۋ جوسپاردا بار. بۇعان قوسا، كاراتە مەن جاۋىنگەرلىك سامبو سىندى سپورت تۇرلەرىن قوسامىز، - دەدى قازاقستان ۇلتتىق ستۋدەنتتەر سپورت وداعىنىڭ پرەزيدەنتى.
سونداي-اق حالىقارالىق ۋنيۆەرسيتەتتەر سپورتى فەدەراسياسى 2029 جىلعى بۇكىلالەمدىك قىسقى ۋنيۆەرسيادا ويىندارىن دا قازاقستاندا ەكىنشى رەت وتكىزۋ ماسەلەسىن قوزعاعان.
2017 جىلى ەلىمىزدە وتكەن ۋنيۆەرسيادانىڭ وتە جوعارى دەڭگەيدە ۇيىمداستىرىلعانى تۋرالى پىكىرلەر كوپ بولدى. زەرتتەۋ قورىتىندىسىنا سايكەس، وسى شارادان كەيىن سپورتپەن اينالىساتىن ستۋدەنتتەر سانى 40 پايىزدان 75 پايىزعا ءبىر-اق وسكەن. ياعني، ۋنيۆەرسيادا تالاي جاستىڭ سپورتقا دەگەن قىزىعۋشىلىعىن وياتقان، - دەدى قايرات زاكيريانوۆ.
سوندىقتان، بۇكىلالەمدىك قىسقى ۋنيۆەرسيادا ويىندارىن ەكىنشى مارتە ەلىمىزدە وتكىزۋدىڭ ماڭىزى زور.
