الماتىدا ايەلىن پىشاقتاپ ولتىرگەن پوليسەي قاندى قىلمىستى جۇمىس ۋاقىتىندا جاساعان بولىپ شىقتى دەپ حابارلايدى bairaqmedia.kz

ءبىزدىڭ رەداكسياعا مۇنى دالەلدەيتىن قۇجات كەلىپ ءتۇستى. الماتى وبلىستىق پوليسيا دەپارتامەنتى قىزمەتكەرلەرىنىڭ جۇمىستا بولعان ۋاقىتى بەلگىلەنگەن قاعازدا سەرىك ءناحيموۆتىڭ سول كۇنى، ياعني، 3 مامىردا جۇمىستا بولعانى انىق كورسەتىلگەن. ياعني، تاڭعى 8:00-دەن كەشكى 20:00-گە دەيىن الماتى-بىشكەك تراسساسىندا قىزمەتتە بولۋى ءتيىس بولعان.

الايدا، كۇدىكتى تاڭەرتەڭ جۇمىسقا كەلگەنىمەن، تۇستە بەلگىسىز سەبەپپەن كەتىپ قالعان. سول ۋاقىتتا ول شۇعىلا ىقشاماۋدانىنداعى پاتەرىنە بارىپ، ايەلىن پىشاقتاپ، ارتىنشا ءوزىنىڭ موينىن سۋىق قارۋمەن ورىپ جىبەرگەن بولاتىن. جانتۇرشىگەرلىك قىلمىستى ول 3 بالاسىنىڭ كوزىنشە جاساعان.

ال، مامىردىڭ ءبىرى جانە ەكىسى كۇندەرى 39 جاستاعى ەر ادام دەنساۋلىعىنا بايلانىستى جۇمىستا بولماپتى.

وسىلايشا، الماتى قالالىق پوليسيا دەپارتامەنتى تاراتقان اقپاراتتىڭ شىندىققا جاناسپايتىنىن بايقاۋعا بولادى. ونداعىلار كۇدىكتىنىڭ الماتى وبلىسىنىڭ پوليسيا دەپارتامەنتىنە قاراستى بولىمشەلەردىڭ بىرىندە قىزمەت ەتكەنىن راستاعانىمەن، بۇعان دەيىن قىزمەتىنەن قۋىلعان دەگەن ەدى.

ءقازىر سەرىك ناحيموۆ كۇزەتتىڭ باقىلاۋىمەن اۋرۋحانادا جاتىر. ول جانساقتاۋ بولىمىنەن حيرۋرگيا بولىمشەسىنە اۋىستىرىلعان. دەنساۋلىعى ورتاشا اۋىر جاعدايدا دەيدى دارىگەرلەر.

قايعىلى وقيعا وتكەن سەنبىدە ورىن العان ەدى. كۇيەۋى اياۋسىز پىشاقتاعان 34 جاستاعى ايەل العان جاراقاتتارىنان سول جەردە ءتىل تارتپاي كەتكەن. ول ۇزىناعاش اۋىلىندا بالاباقشا ديرەكتورى بولىپ قىزمەت ەتىپتى. ال، كيكىلجىڭگە وتباسىلىق جانجال سەبەپ بولعان.

كورشى-قولاڭ ەرلى-زايىپتىنىڭ ءجيى جانجالداسقانىن ەستىگەندەرىن مالىمدەدى. ءقازىر قاندى قىلمىسقا قاتىستى قىلمىستىق ءىس قوزعالىپ، تەرگەۋ ءجۇرىپ جاتىر.