ءۇش كۇن بۇرىن جايىققا باتقان جىگىت ىزدەستىرىلىپ جاتىر، دەپ حابارلايدى Bairaqmedia.kz.

تجد اقپاراتىنا سايكەس، 3 مامىردا ساعات 17:25-تە جايىق وزەنىنە ەر ادامنىڭ سۋعا باتىپ كەتكەنى تۋرالى قوڭىراۋ تۇسكەن. شاقىرتۋ تۇسكەن ساتتەن باستاپ، اتىراۋ وبلىسى تجد قۇتقارۋشىلارى وقيعا ورنىنا جەدەل بارعان. 2007 جىلى تۋعان ازامات وزەننىڭ ارعى بەتىنە ءوتىپ بارا جاتىپ، موتورلى قايىقتان قۇلاپ كەتكەنى انىقتالدى. اتالعان ورىندا قۇتقارۋشىلار ىزدەستىرۋ جۇمىستارىنا شۇعىل كىرىستى.

ىزدەستىرۋ جۇمىستارىنا كۇشەيتىلگەن تۇردە كۇش پەن قۇرالدار جۇمىلدىرىلدى. اتاپ ايتقاندا، كۇن سايىن 12 قۇتقارۋشىدان كەم ەمەس، 4 ءجۇزۋ قۇرالى، 3 تەحنيكا جانە ۇشقىشسىز ۇشۋ اپپاراتى (ۇۇا) جۇمىلدىرىلدى. سونىمەن قاتار، پد قىزمەتكەرلەرى جانە كەمەسى تارتىلدى، – دەلىنگەن حابارلامادا.

ىزدەستىرۋ جۇمىستارى سۋ استىنا سۇڭگۋ، اكۆاتورياعا كوزبەن شولۋ جانە وزەن ءتۇبىن ترالداۋ ارقىلى جۇرگىزىلىپ جاتىر. بۇگىنگە دەيىن شامامەن 2 شاقىرىم اۋماقتا جۇمىستار جۇرگىزىلدى.

اعىستىڭ قاتتى بولۋى، سۋ استىندا كورىنۋ دەڭگەيىنىڭ وتە تومەن بولۋى جانە سۋ استىنداعى بوگدە زاتتاردىڭ كەزدەسۋى ىزدەستىرۋ جۇمىستارى كەزىندە قيىندىق تۋعىزعان.

ىزدەستىرۋ جۇمىستارى جالعاسىپ جاتىر.