ۇلى ابايدىڭ 180 جىلدىق مەرەيتويىنا ارنالعان حالىقارالىق، رەسپۋبليكالىق جانە وڭىرلىك دەڭگەيدە 100-دەن استام اۋقىمدى ءىس-شارانى قامتيتىن كەشەندى جوسپار بەكىتىلدى. بۇگىن وڭىرلىك كوممۋنيكاسيالار قىزمەتى الاڭىندا وتكەن باسپا ءسوز ءماسليحاتىندا اباي وبلىسى مادەنيەت، تىلدەردى دامىتۋ جانە ارحيۆ ءىسى باسقارماسىنىڭ باسشىسى جانجىگىت ومارحان، اباي اۋدانىنىڭ اكىمى مەيىرجان سماعۇلوۆ، سەمەي قالاسى اكىمىنىڭ مىندەتىن اتقارۋشى بەكجان باپىشيەۆ مەرەيتويعا ارنالعان ونكۇندىكتىڭ باعدارلاماسىمەن تانىستىردى، - دەپ جازادى bairaqmedia.kz.
اۋقىمدى باعدارلاما 1 تامىز كۇنى «ABAY ACADEMIYASY» ەنسيكلوپەديالىق پورتالىنىڭ اشىلۋىمەن باستالادى. بۇل بىرەگەي پلاتفورما اقىن مۇراسىن سيفرلاندىرۋ، جۇيەلەۋ جانە عىلىمي ورتاعا قولجەتىمدى ەتۋگە باعىتتالعان. سول كۇنى ماقانشىداعى الاكول جاعاسىندا قازاقستاننىڭ حالىق ءارتىسى سەكەن تۇرىسبەكوۆ پەن «اق جاۋىن» وركەسترىنىڭ كونسەرتى وتەدى. سەمەيدەگى اربات الاڭىندا يلليۋستراتور اڭساعان مۇستافانىڭ كورمەسى اشىلىپ، «اسىل مۇرا» وبلىستىق قولونەر فەستيۆالى ۇيىمداستىرىلادى، – دەپ اتاپ ءوتتى باسقارما باسشىسى.
سونىمەن قاتار، 2-6 تامىز ارالىعىندا قازاقستاننىڭ حالىق ءارتىسى مايرا يلياسوۆانىڭ ابايعا ارنالعان گاسترولدىك كونسەرتى سەمەيدەن باستالىپ، ءۇرجار، اياگوز، جارما جانە جاڭاسەمەي اۋداندارىندا جالعاسادى.
3 تامىزدا اباي تەاترىندا «اباي الەمى» رۋحاني كەشى وتسە، 4 تامىزدا سەكەن تۇرىسبەكوۆ پەن «اق جاۋىن» وركەسترىنىڭ قورىتىندى كونسەرتى ۇسىنىلادى.
5 تامىزدا «وي تولعاۋ – حاكىم اباي» مونووپەراسى ساحنالانادى جانە 6 تامىز كۇنى اباي الاڭىندا «اباي ەلى – ونەر كەنىشى» كونسەرتى مەن ءا.بوكەيحانوۆ ۋنيۆەرسيتەتىندە «ولەڭ ءسوزدىڭ پاتشاسى» اتتى جاس اقىندار ءمۇشايراسى وتپەك.
7–9 تامىز كۇندەرى اباي مۇراسىن عىلىمي، ادەبي جانە مادەني تۇرعىدا كەڭىنەن ناسيحاتتاۋعا باعىتتالعان ءبىرقاتار مازمۇندى ءىس-شارالار وتەدى. 7 تامىزدا حالىقارالىق «الاش» سىيلىعىنىڭ يەگەرى اسقار التايدىڭ شىعارماشىلىق كەشى اياسىندا «اباي جولى» ەنسيكلوپەدياسى مەن باعاشار تۇرسىنبايدىڭ «اباي قۇنانباي ۇلى كىم؟» كىتابىنىڭ تۇساۋكەسەرى بولادى. 8 تامىزدا سەمەيدە «ادامزاتتىڭ ابايى» رەسپۋبليكالىق اقىندار ايتىسى، اباي اۋدانىندا «جەتى قازىنا» ۇلتتىق بايقاۋىنىڭ اشىلۋى وتسە، 9 تامىزدا شاكارىم ۋنيۆەرسيتەتىندە حالىقارالىق عىلىمي كونفەرەنسيا، «جيدەباي-بورىلى» مۋزەيىندە كورمە، اباي كىتاپحاناسىندا كىتاپتار توپتاماسىنىڭ تۇساۋكەسەرى مەن 15 ەلدىڭ قاتىسۋىمەن حالىقارالىق اقىندار فەستيۆالى ۇيىمداستىرىلادى. كەشكىسىن ورتالىق الاڭدا «ابايعا تارتۋ» كونسەرتى وتەدى، – دەدى سپيكەر.
10 تامىز – اباي كۇنى. بۇل كۇنى تاڭەرتەڭ جيدەبايدا قۇران باعىشتالىپ، قۇرباندىق شالۋ راسىمىنەن باستاۋ الادى. ودان سوڭ ەلىمىزدىڭ بارلىق وڭىرىندە اباي ەسكەرتكىشىنە گۇل شوقتارىن قويۋ ءراسىمى ۇيىمداستىرىلماق.
