رەسمي دەرەكتەرگە جۇگىنسەك، بۇگىندە ەلىمىزدە 110 مىڭعا تارتا ادام ديناميكالىق باقىلاۋدا تۇر. ولاردىڭ  90 مىڭنان استامى الكوگول ونىمدەرىنە، قالعانى (18 243 ادام) ەسىرتكىگە تاۋەلدى، دەپ حابارلايدى bairaqmedia.kz

دەسە دە كەي ساراپشىلار ەلىمىزدە ەسىرتكىگە ەلىككەن ازاماتتار الدەقايدا كوپ دەيدى. ياعني، 143 مىڭ تۇرعىن ەسىرتكىنىڭ ق ۇلى دەپ بولجايدى. سەبەبى اقىلى كلينيكالاردا ەمدەلۋشىلەر تۋرالى دەرەكتەر ەشقايدا تىركەلمەيدى. 

الماتىلىق ناركولوگتار ەسىرتكى تۇتىنۋشىلاردىڭ دەرتىنىڭ ەمى بار دەيدى. ءقازىر سينتەتيكالىق ەسىرتكى جاستاردىڭ ساناسىن كوز ىلەسپەس جىلدامدىقپەن ۋلاپ جاتقانى جاسىرىن ەمەس.

الماتى قالالىق پسيحيكالىق ساۋىقتىرۋ ورتالىعىنىڭ ماماندارى مۇنداي ازاماتتاردى ەمدەۋگە دايىن. مەكەمە ديرەكتورى ساپار راحمەنشەيەۆتىڭ ايتۋىنشا، ناۋقاستار قاتارىندا ءالى كامەلەتكە تولماعان بالالار دا بار. 

بىزدە جاسوسپىرىمدەر ديسپانسەرلىك باقىلاۋدا تۇر. ونىڭ ىشىندە جاسى 16-17 جاستاعى بالالار بار. ولار ەسىرتكىگە تاۋەلدى بولامىن دەپ قولدانبايدى. ەسىرتكى تاراتاتىن ادامدار «مۇنى ءبىر رەت قولدانساڭ، تاۋەلدى بولمايسىڭ» دەيدى عوي. سوندىقتان، مىناۋ ءوسىپ كەلە جاتقان بالالاردىڭ سانا-سەزىمدەرىن ءسويتىپ الداپ، ءدامىن كورسەتۋگە تىرىسادى، - دەيدى الماتى قالالىق پسيحيكالىق ساۋىقتىرۋ ورتالىعىنىڭ ديرەكتورى ساپار راحمەنشەيەۆ.

ەگەر ناۋقاس مامانداردان ۋاقىتىلى كومەك الاتىن بولسا، ونى تاۋەلدىلىكتەن قۇتقارۋعا بولادى دەيدى دارىگەر.  ال، قۇرامىندا ءتۇرلى حيميالىق زاتتارى بار  سينتەتيكالىق ەسىرتكى ادامنىڭ جۇيكە جۇيەسىنە تىكەلەي اسەر ەتەدى ەكەن. سوندىقتان، ونى تۇتىنعان ادامنىڭ ويلاۋ قابىلەتى ءبىر دەڭگەيدە قالىپ قويادى.

مىسالى 14 جاستاعى بالا ەسىرتكىنى قولدانىپ كورەتىن بولسا، ويلاۋ قابىلەتى سونىڭ كوسىرىنەن سول 14 جاستا، ياعني ءبىر دەڭگەيدە قالىپ قويادى. سينتەتيكالىق ەسىرتكىنى ۇزاق قولداناتىنداردىڭ ورتاشا ءومىر ءسۇرۋ ورتالىعى 5 جىلعا دەيىن. كەيدە 5 جىلعا جەتپەيدى، - دەدى ساپار راحمەنشەيەۆ.

سوندىقتان، ماماندار زياندى ادەتتەردەن اۋلاق بولىپ، سالاۋاتتى ءومىر سالتىن ۇستانۋعا شاقىرادى. سەبەبى، ەسىرتكىنىڭ ق ۇلى بولامىن دەپ، قاندى قىلمىس جاساپ، اقىر سوڭىندا بار ءومىرىن تەمىر توردىڭ ار جاعىندا وتىكىزىپ جاتقاندار جەتەرلىك.