Bıyl aqpan aıynda Túrkistan qalasyna «World Craft Council» halyqaralyq uıymynyń sheshimimen «Qolónershiler qalasy» mártebesi berilgen bolatyn. Osy mártebe aıasynda 26-28 qyrkúıek kúnderi Túrkistanda «Túrkistan - qolónershiler qalasy» halyqaralyq festıvali ótedi, - dep habarlaıdy bairaqmedia.kz

Halyqaralyq sharaǵa daıyndyq jumystary qarqyndy júrgizilýde. Búgin Túrkistan oblysy ákiminiń birinshi orynbasary Zulpyhar Joldasov pen qala ákimi Ázimbek Pazylbekuly jáne sala basshylary arnaıy «Qolónershiler qalashyǵy» keshenin aralap, daıyndyq barysymen tanysty.

«Túrkistan – qolónershiler qalasy» atty halyqaralyq festıválge álemniń 7 elinen 50-ge jýyq qolónershi jáne Qazaqstannyń túkpir-túkpirinen 100-ge tarta sheber qatysady dep josparlanýda.

Festıvál aıasynda dástúrli qolóner týyndylarynyń kórmeleri, sheberlik saǵattary, mádenı baǵdarlama uıymdastyrylyp, ulttyq qundylyqtar dáripteledi. Al «Qolónershiler qalashyǵy» kesheniniń ashylý saltanatynda elimizge tanymal estrada juldyzdary men ónerpazdardyń konserttik baǵdarlamasy ótedi.

Jalpy aýmaǵy 2,3 gektardy quraıtyn keshenniń qurylysy 1,5 gektar jerde júrgizildi. Týrısik jáne mádenı baǵyttaǵy bul ortalyq 8 negizgi fýnksıonaldy bólikten turady.

Munda 20 sheberhana, 2 shoýrým, kórme zaly, meıramhana, qonaqúı jáne ózge de qajetti ınfraqurylymdar qarastyrylǵan. 

Sonymen qatar, óńirlik erekshelikter men tutynýshylar suranysyna sáıkes arnaıy brendtik katalog ázirlenip, ulttyq kádesyılar naryqqa usynylatyn bolady.