Memleket basshysy Qasym-Jomart Toqaev Amýr oblysyndaǵy ushaq apatyna baılanysty Reseı Federasıasynyń Prezıdenti Vladımır Pýtınge kóńil aıtty, dep habarlaıdy Aqorda.
Aıta keteıik, Blagoveshensk–Tynda baǵyty boıynsha ushyp bara jatyp joǵalyp ketken An-24 jolaýshy ushaǵynyń qaldyqtary Tynda qalasynan 15 shaqyrym jerdegi Kývykta eldi mekeni mańynan tabylǵan.
Telegram-arnanyń habarlaýynsha, ushaqtyń fúzelájy qıraǵan jáne janyp jatyr. Ázirshe tiri qalǵandar týraly aqparat joq.
Ushaq bortynda 48 adam bolǵan. Olardyń ishinde bes bala, tórt ekıpaj múshesi jáne áýe kompanıasynyń eki qyzmetkeri bar.
Ushaq "Angara" áýe kompanıasyna tıesili. Ol Blagoveshensk qalasynan jergilikti ýaqytpen saǵat 11:00-de ushqan.
Tynda qalasyna qoný kezinde ekinshi aınalymǵa ketip, baılanysqa shyqpaı qalǵan.
Buǵan deıin apatty jaǵdaıda iske qosylýy tıis radıomaıaktardyń istemeı qalǵany týraly habarlanǵan edi. Bul izdestirý jumystaryn qıyndatqan. Apatqa baılanysty ushý qaýipsizdigi erejelerin buzý baby boıynsha qylmystyq is qozǵaldy.
