Prezıdent Izraıl memleketi Knessetiniń tóraǵasy Amır Ohanany qabyldady, dep habarlaıdy Bairaqmedia.kz.

Qasym-Jomart Toqaevtyń aıtýynsha, Izraıl Parlamenti spıkeriniń Qazaqstanǵa sapary qazaq-ızraıl qarym-qatynasyn nyǵaıtýǵa eki eldiń de beıil ekenin rastaıdy. Memleket basshysy ekijaqty yntymaqtastyqtyń perspektıvasyn qarastyrý turǵysynan bul sapardyń máni zor dep sanaıdy.

Kezdesýde saýda-ekonomıkalyq seriktestikke basa nazar aýdaryldy. Sonymen qatar sý resýrstary salasyndaǵy kooperasıa máselesi talqylandy. Qasym-Jomart Toqaev Izraılde jasalǵan ozyq tehnologıalarǵa joǵary baǵa berip, elimiz atalǵan baǵytta seriktestik ornatýǵa ázir ekenin rastady, – delingen Aqorda habarlamasynda.

Amır Ohana qonaqjaılyq tanytqany úshin Qazaqstan prezıdentine alǵys aıtty. Ol eki eldiń kópjosparly baılanystarynyń tabysty damyp, yqpaldastyqtyń jańa múmkindikterine jol ashyp kele jatqanyna toqtaldy.