Eńbek jáne halyqty áleýmettik qorǵaý mınıstrligi Eńbek kodeksine ózgerister men tolyqtyrýlar engizý týraly zań jobasyn jarıalady. Onda jumys ornyndaǵy "jynystyq bopsalaý" máselesi qaralǵan dep habarlaıdy bairaqmedia.kz

Qujat ashyq-normatıvtik qujattar portalynda talqylanyp jatyr.

Áleýmettik saýalnamaǵa sáıkes, jumyskerlerdiń 30%-y etıkaǵa saı kelmeıtin qarym-qatynasqa tap bolǵan. Mundaı jaǵdaıda shaǵymdaný men qorǵaýdyń naqty tetigi joq. Qazaqstan HEU-nyń №190 Konvensıasyn ratıfıkasıalaǵan joq. Biraq osy baǵytta qozǵalýy tıis, - delingen qujatta.

Iaǵnı, qazirgi Kodekste jynystyq qýdalaýdyń quqyqtyq anyqtamasy, olardyń belgileri, shaǵym berý prosedýralary jáne qorǵaý sharalary joq. Bul jumysshylardy jumys ornyndaǵy zorlyq-zombylyqtan qorǵaý múmkindigin azaıtady.

Zań jobasy avtorlarynyń pikirinshe, Kodekske ózgerister engizilse, bul jumys berýshilerdi jynystyq qýdalaý jaǵdaılaryna qatysty shaǵymdardy qaraýdyń ishki rásimderin ázirleýge mindetteıdi. osylaısha, qyzmetkerler óz quqyqtaryn qorǵaýǵa qosymsha kepildik alady.