Kókshetaýda sheneýnik sybaılastarymen birge jaǵajaı salýǵa bólingen qarjyny jymqyrǵan, dep habarlaıdy Bairaqmedia.kz.

Aqmola oblysynyń arnaıy prokýrorlary Kókshetaý qalasynda búdjet qarjysyn iri kólemde jymqyrý faktisin anyqtady. Qala ákimdiginiń turǵyn úı-kommýnaldyq sharýashylyq bóliminiń burynǵy basshysy, tehnıkalyq qadaǵalaý qyzmetin atqarǵan «M-Stroı Proekt» JSHS, sondaı-aq merdiger «PavlodarEnergoMontaj» JSHS basshylary ýaqytsha ustaý ızolátoryna qamaldy.

Tergeý dereginshe, 2021 jyly Kókshetaýda eski aeroporttan Qan ortalyǵyna deıin salynýǵa tıis bolǵan «Naberejnaıa» jobasyna bólingen 170 mıllıon teńgeden astam qarjy talan-tarajǵa túsken.

Kúdiktilerdiń áreketteri QR QK-niń 189-baby 4-bóligi («Asa iri kólemde senip tapsyrylǵan múlikti ıemdený nemese talan-tarajǵa salý») boıynsha saralanyp otyr. Bul bapta 12 jylǵa deıin bas bostandyǵynan aıyrý jáne múlkin tárkileý qarastyrylǵan, – delingen habarlamada.

Tergeý barysynda Astana qalasynan quny 95 mln teńge bolatyn komersıalyq jyljymaıtyn múlik tabylyp, tárkileýge jatatyn múlik retinde tirkeldi.

Sonymen qatar, tergeý barysynda jymqyrylǵan qarajattyń bir bóligi Atbasar qalasyndaǵy basqa qurylys nysanyna jumsalǵany belgili boldy. Osyǵan baılanysty bir kúdiktiniń áreketi Qylmystyq kodekstiń 218-baby 3-bóligi («Zańsyz tabys pen múlikti zańdastyrý» (aqshany jylystatý) boıynsha da saralandy. Bul bap boıynsha 10 jylǵa deıin bas bostandyǵynan aıyrý jazasy kózdelgen.

İs boıynsha tergeý aıaqtalýǵa jaqyn, endi sońǵy sheshimdi sot shyǵarady.